فى بيتنا مدمن للإباحيه

فى بيتنا مدمن...أه مدمن بس مش مدمن من اللى بالكم فيه اللى بيشرب مخدرات وبيضرب حقن،فيه نوع تانى من الادمان انتشر فى كل بيت عربى و أنا بعنيها حرفيا كلللللل بيت عربى و هو إدمان المواقع الاباحيه أو فيديوهات اليوتيوب الإباحيه

حضرتك تبقى لسه شارى الموبايل جديد و قاعد كده برىء جدا وبتقلب فى النت بدون أى أهداف دنيئه ويطلعلك لينك او اعلان يجرك لصفحه عالفيسبوك مثلا والصفحه تجرك للينكات عليها توديك لمواقع اباحيه وهكذا ، أو تفتح اليوتيوب عادى جدا بتتفرج على حاجات عاديه وفجأه تلاقى فيديو اباحى فياخدك الفضول وتفتحه فيبدأ اليوتيوب كتر الف خيره يعملك Recommend  أو اقتراحات لفيديوهات مشابهه للى سيادتك فتحته وتابعت محتواه

وتبدأ من هنا ماسوره ميه وسخه تنزل كل محتواها اللى مابينتهيش على موبايل سيادتك فتعجبك اللعبه وكل فيديو تفتحه يصاحبه اقتراحات جديده لفيديوهات أوسخ وتدمنها ومايشبعكش انك تفتح فيديو أو اتنين وتبدأ بدل ما كانت قاعد عالنت ساعه يبقوا ساعتين وبعدها تلاته وبعدها أربعه وشويه وتحس ان الفتره دى مش بتشبعك ومحتاج أكتر

و تدخل تنام فطفلك يمسك تليفونك بيلعب فيه فيبدأ يلاقى فيديوهات غريبه عليه فتعجبه فيبدأ يفتحها ويفتح المقترحات المشابهه ليها من فيديوهات

والحقيقه ان اليوتيوب ما خلصوش ان الفيديوهات الاباحيه تبقى للكبار فقط...لا هم كتر الف خيرهم عملوا فيديوهات شبه الكارتون كده فيها مقاطع جنسيه للاطفال كمان
عشان البيت كله يهيص و بدل مايبقى فيه مدمن واحد و لا اتنين يبقى فيه أطفال كمان مدمنين فى نفس البيت و تلاقى واحده غلبانه سواء أم أو زوجه أو ابنه كلهم متوليين محاربه الاباحيه فى بيت كان مسالم وعايش حياه هاديه قبل النيله الموبايلات الTouch ما تدخل حياتنا ويمسكها الكبير والصغير والمسن وكل الأعمار

على الاقل زمان كان الكمبيوتر مقتصر على فئه عمريه معينه اللى هم الشباب والكبار كانوا اذا استخدموه فبيبقى فالشغل بس وبالعافيه بيفهموا فيه وكان مابيلمسوش الأطفال خالص بحجه ان الكمبيوتر نايم دلوقتى

أما دلوقتى فالطفل من عمر سنتين بيمسك الموبايل ويستخدمه أسهل وأسرع من اللى صنعوه ذات نفسهم ولما يتم 4 سنين بيجيبوله موبايل والراجل المسن عنده موبايل و شغال عليه وكأنه خبير الكترونيات وتكنولوجيا من وهو فى اللفه 

ومطلوب مننا نعيش حياه سويه طيب ازاى !!

ده كل بيت فيه حرب نفسيه غير معلنه جوه كل ست ...

__الزوجه اللى شافت جوزها بيتفرج وحكت لصاحبتها أو مامتها فقالولها ماتخربيش على نفسك ولا تعرفيه انك شوفتى حاجه والبسيله الاحمر والاخضر واصبغى شعرك برتقانى وحطيله روج احمر وحسنه جنب شفايفك وفستان قصير واتدلعى واتشخلعى وهو هيبطل اللى بيعمله ده

__البنت اللى بتشوف أبوها بيفتح الحاجات دى و كل ماتصحى من نومها تبقى خايفه تخرج من اوضتها عشان ابوها اللى طول عمرها بتحبه ماينزلش من نظرها أكتر لما تشوفه بيتفرج عالستات وهم بيقلعوا هدومهم ولما تحكى لصاحبتها تقولها ده باباكى عيب تصارحيه انك شوفتى حاجه زى كده انتى مش هتربيه

 __الأم اللى ابنها ولا بنتها الصغيرين  فتحوا فيديوهات كارتون فيها مشاهد اباحيه فبقت كل ما تغير اعدادات اليوتيوب وتشغل خاصيه فلتره المحتوى يدخلوا العيال ويلغوا الخاصيه تانى 

فتقطع عنهم النت من الراوتر فيفتحوه من الباقه اللى عالموبايل

والمشكله ان سكوت الست بيدى احساس للراجل انه حويط وماحدش شايفه و دى مصيبه أكبر لأنه احساسه انه اسماله عليه حويط وماحدش شايفه بيخليه يفتح حاجات اكتر على اساس انه فتك بقى والست دى عميا ومابتشوفش حاجه

و المصيبه ان الموضوع ده بالذات غير قابل للنقاش لأن ماحدش بيتغير عشان اتقفش وهو بيتفرج وهيقولك وايه يعنى عدت على خير هكررها تانى بقى طالما ان المشكله خلصت بسهوله والست بطبعها ماتعرفش تخبى اللى مزعلها خصوصا فى مواقف كبيره زى دى
فهى حتى لو ما حكيتش فهى بتخزن جواها وده بينعكس على كل تصرفاتها ،وبتلاقيها واحده كانت منوره كده لكن بقت بتدبل كل يوم وتموت فى انتظار شخص أنانى انه يخرج من ادمانه ويرجع شخص طبيعى تانى

ومهما الست اتشقلبت وحاولت تبين للراجل ان فيه شىء مزعلها هيفتكرها مكتئبه أو زعلانه مع نفسها كده او هرموناتها جايبالها المود الوحش ده لكن مستحيل ولا ممكن ابداااا يفكر انها ممكن تكون زعلانه منه أو انه السبب فى زعلها أو انها  كاتمه فقلبها بسببه وساكته لأنه ملاك وجناحاته بتخبط فحيطان البيت طول الوقت ولايمكن مطلقا انه يكون السبب فى زعلها 

وتفضل الست تسكت وتنتظر وتنتظر بس وللأسف الانتظار بيطول والادمان مابيخلصش ...