هنساه...عادى

أوقات بيكون الحب والنسيان حاجتين ضد بعض وكأن الحب ده محرض أساسى لقلوبنا عشان دايما يكون جوانا حنين للحبيب فمنقدرش أبدا ننساه ونفضل فى كل مناسبه وكل وقت نفتكره وحتى لو بدأنا ننسى وجراحنا بدأت تلتئم ترجع أوجاعنا تتجدد بأشاره صغيره أو موقف تافه ويبدأ جرحنا ينزف من جديد

النسيان فى حد ذاته مش شىء صعب وبالتحديد لمايكون نسيان الحبيب لأن الحبيب بشر زيه زينا مهوش ملاك نزل عالأرض ويمكن الحبيب أكتر شخص بناخد بالنا من غلطاته وعيوبه عن أى شخص تانى فى الكون عشان بنكون بندور جواه على علاقه مثاليه مفيهاش غلطه وده يمكن مبنعملوش مع صحابنا ولا اخواتنا ولا أهلنا لكن مع الحبيب بنعمله وبنعمل زووم على كل تصرفاته وتعبيراته وكلماته ....بنعمل ده معاه عشان عايزين دايما نحس بالأمان والأمان دى مجرد كلمه لكن جواها حاجات كتير أوى

الأمان عند المرأه زى لعبه المكعبات اللى بتعملنا فى الأخر صوره كامله لطائر أو حيوان فلازم المكعبات دى تتحط صح جنب بعضها عشان الصوره دى تكمل لكن لما يبقى مكعب تحت ومكعب فوق ومكعب للجنب عمرها مهتكمل وهو ده بالظبط الأمان مجموعه من التصرفات والقيم والأحاسيس اللى بنشوفها من الطرف الأخر بنجمعها عشان نحس بالأمان لوفقدت أجزاء من صوره الأمان اللى محتاجينها دى يبقى العلاقه كلها بدأت تدخل فى مرحله الانهيار

المشكله بقى ان مرحله الانهيار دى بندخلها برجلينا واحنا راضيين مبنوقفش قبل ما المبنى ينهار كله على راسنا بنقول لاهنكمل وفى الحقيقه لما بنقول اننا هنكمل مبنكونش مدركين لمدى خطوره اللى بنعمله لأن احنا بنحتاج نكمل عشان منقفلش كل أبواب العلاقه دى فنحس بالندم والخوف اننا بقينا لوحدنا،برده احنا بشر بنكون عايزين الاهتمام والحب فى حياتنا فمابالكم لو كان فعلا فيه مشاعر وأحاسيس ماليه حياتكم وفجأه كده تلاقوا نفسكم رجعتوا لنقطه الصفر اللى بدأتوا منها وللأسف برده ان نقطه الصفر دى لمابترجعولها بعد فشل قصه حب مبتكونش على نفس شكلها قبل الدخول فى العلاقه دى لأنها بتكون اتملت ذكريات ومشاعر كتير محفوره من الحبيب 

بس مع شويه تفكير عاقل من العقل مش من القلب هتلاقوا ان الغلطات والعيوب اللى كنتوا بتتناسوها دايما دى حاجات كبيره أوى فى مضمونها هتلاقوها كانت بتيجى على كرامتكم ومش بتخدشها بس لا دى كانت بتجرحها وتخليها تنزف وبالرغم من كده كنتم مكملين وأنتم مش عارفين أنتم مكملين ليه وبيبدأ سؤال مهم أوى وهو :هل احنا فى العلاقه دى مسيرين ولامخيرين؟والحقيقه بتقول انكم مخيرين بس اللى بيحصل ان القلب بيخليكم مسيرين بشكل كامل وبيكون الحب هنا زى الادمان بالظبط وهو ان الادمان حاجه وحشه وكلنا عارفين ده بس لما أجى أدمن مينفعش فجأه كده أبطل ادمان و لو بحاول أتراجع عن الادمان فى بداياته هخاف من ان الأعراض اللى عندى تنكشف قدام الدنيا كلها ويتقال انى مدمنه فبكمل الادمان وكل ما فتره الادمان تزيد كل ما الجرعه بتكبر وكل ما الخروج من الحاله دى بيكون أصعب وهو ده بالظبط اللى بينطبق على الحب

و فى طريقه حلوه أوى عشان متفضليش تفكرى فى مميزات حد حبيتيه وسبتوا بعض وتقعدى بالسنين تفكرى فيه وفى انك ممكن تكونى السبب انه سابك أو انك لما اتعصبتى فى الموقف كذا فهو بقى كرهك فجأه كده وقرر يسيبك ...كل دى حاجات أنتى بتبررى لنفسك بيها انفصالكم بس محدش بيسيب حد وهو فعلا مهتم بيه وبيحبه وافتكرى ان ساعه متكونى انتى بتفكرى كده مبتكونيش أنتى ساعتها على باله أصلا ويمكن يكون بيحب جديد ولا اتجوز وسعيد فى حياته وأنتى اللى منكده على نفسك....

هاتى ورقه وقلم وارسمى جدول اكتبى فيه عيوب اللى كنتى بتحبيه وكام مره أهانك وكام مره جرحك وكام مره سابك وكام مره حسيتى انه بيكدب عليكى وأنتى عدتيها بمزاجك وكام مره حسيتيه بيكدب فى أحاسيسه تجاهك وايه أكتر حاجات موتت الاحساس بالأمان جواكى وبعد متعملى كل ده افتكرى قد ايه أنتى ظلمتى نفسك بالعلاقه دى وانك كسبتى نفسك لمابعدتى مش خسرتى زى ما أنتى متخيله

وساعه ماتفكرى مع نفسك صح وتوصلى للنتائج الصح اللى كانت غايبه عنك مع مرايه الحب العميا ساعتها بس هتقدرى تنسيه....عادى