لما تتأكد انك بقيت لوحدك...

يااااااااه لما تقعد مع نفسك وتراجع حساباتك وتتأكد انك بقيت لوحدك ،أنت ممكن تكون كنت عارف انك لوحدك ولوحدك أوى وبالرغم من كده بتأوح وتضحك على نفسك وتقول انك ليك ناس بتحبك ولو حصلك حاجه هتزعل عشانك ولو وقعت هيشدوك عشان تقف وتكمل ضحكك على نفسك و تبتسم فى وش الناس وتضحك بصوت عالى وتخدعهم بضحكتك لدرجه انهم يتخيلوا انك أسعد انسان فى الدنيا كلها مع انك بتكون عارف انك بتخدع نفسك قبل ماتكون بتخدع الناس وفى وقت ما الناس كلها بتقول انك سعيد أنت بتكون عارف انك أتعس حد فى الدنيا وانك عايش بس عشان تستنى امتى هتموت  لكن غباءهم بيخليهم يتخيلوا انك متفائل وسعيد وعايش حياتك بالطول والعرض مع انك مش كده أبدا

بس المرحله  الأصعب هى المرحله اللى بتتأكد فيها انك لوحدك ومتقدرش ساعتها تكمل ضحك على نفسك ولاتخدع نفسك أكتر من كده لأنك لو فكرت تضحك عشان تقنع نفسك انك سعيد هتلاقى نفسك بتصرخ وتبكى  وتنهار وروحك بتقولك انها مش مسامحاك عشان بتعاندها 

لما تيجى تنام وتبقى عارف انه خلاص محدش هيطبطب عليك بتلاقى نفسك أنت بتطبطب على راسك وبتحضن نفسك عشانها محتاجه منك ده ومحدش هيعمل ده لو أنت معملتوش 

ولما تلاقى قلبك بيقولك أنت كويس أنت عايش أنت سعيد وهتلاقى اللى يخاف عليك ويقويك بس اصبر شويه وبكره كل حاجه هتبقى كويسه فتصبر بس تلاقى بكره ده مابيجيش ومفيش حاجه بتبقى كويسه فتحس انك عايز تتمرد وحتى وأنت عايز تتمرد بتلاقى انك مش عايز تتمرد وحاجه من جواك دايما بتقولك لا

وكل شويه تطلعلك شويه أمراض كتير كده وورا بعضها وفلحظه تحس انك خلاص هتقابل رب كريم وتلف على الدكاتره كلهم ويقولولك معندكش حاجه فتتأكد ان دى حاله نفسيه ومش هتنتهى الا بانتهاء أسبابها فتقول لنفسك وهى ايه أسبابها؟مع ان أسبابها واضحه ..انك لوحدك،مفيش حد يدعمك ،مفيش حد يقويك،فاقد الحيويه والنشاط،عدوانى وكلمه واحده بتحولك من حاله لحاله تانيه،يعنى تكون سعيد ومبتسم وبكلمه تخليك تتعصب ممكن تقلب الدنيا وتخسر كل الناس

بتاخد نفس طويل وتغمض عنيك عشان تهدا وبعد ماتهدا تلاقى نفسك بتقول :ايه ده هو أنا عايش ليه؟ ايه لزمتى يعنى؟الجمله اللى بتغلف حياتى هى (مافيش)...مافيش أى حاجه...مافيش صداقه،مافيش حب،مافيش أمل

تبص لنفسك فى المرايا ووشك شكله مرهق مع انك مش مرهق ولاحاجه وتلاقيك بمنتهى اليأس بتقول:طيب وبعدين؟لحد امتى هفضل أنا ونفسى كده بنكلم بعض؟

منتاش عارف بقى اى حاجه فى اى حاجه،ايه الصح وايه الغلط ؟معرفش،الكلام اللى بتقوله للناس ايه اللى فيه صراحه زياده لدرجه انك يتقال عليك وقح وايه اللى يعتبر كلام عادى ميزعلش حد؟ماتعرفش،أنت عارف انك لما بتكون على طبيعتك بتلاقى الناس بتعاملك ببساطه وكأنكم عارفين بعض من زمان وبتحسهم بيشوفوا الجوانب الحلوه فى شخصيتك وبيلمسوها بس المشكله انك أغلب الوقت مش كده...أغلب الوقت عصبى ومزاجك وحش

وحش أوى احساس الوحده ده ومخيف كمان