ايه لزمه الحياه و أنت عايش وحيد جوه نفسك مش لاقى حد يطبطب عليك ولا حد يحسسك انه جنبك وعايز يسمعك وهامه انه يسمع أوجاعك ايه لزمتها وانت حابس نفسك جوه بيتك ونزول الشارع بالنسبه ليك حلم بعيد المنال عشان مش عايز تشوف حد ولا تقابل حد ولا تتكلم مع حد ولا تتخانق مع حد
ايه لزمه الحياه وانت زى الخيال محدش حاسس بيك ولا شايفك ايه لزمتها وأنت لما هتغيب مش هتلاقى حد يدور عليك ويسأل عنك قولولى ايه لزمتها والصحاب اللى بتعرفهم طول حياتك بيطلعوا فى الاخر مش صحاب وعلاقتكم بتنتهى بالتجاهل مجرد تجاهل
ايه لزمه الحياه وانت طول الوقت مخنوق ومش لاقى حاجه تبسطك وبتتخانق لأتفه الأسباب مع ناس مستحيل حد طبيعى يتخانق معاهم ببساطه جدا لانهم معملوش حاجه تستدعى الخناق
لما تحس انك عجزت وعمرك بيجرى بسرعه سنه ورا سنه وكل السنين زى بعض مفيش فرق بينهم الفرق الوحيد انك بتكبر قصدى بتعجز
ايه لزمه الحياه وأنت جوه بيتك قاعد تاكل وتتخن فتخاف تنزل عشان متحسش ان الناس بتبصلك بشكل وحش عشانك تخين،طيب منتا ملقتش حاجه تفرحك علشان تبطل أكل وتحس انك مبسوط وتنزل وتندمج فى وسطهم
حتى الناس اللى متعرفهمش وتقول يمكن دول اللى يكونوا أحن عليا من القريب ومن الصاحب أول متبتدى تتكلم وتحسهم بيتجاهلوك أو مش مهتمين لكلامك تلاقى نفسك بسرعه بتقلب عليهم وتتخانق مع ان ده الطبيعى اللى يعنى الصاحب و القريب مبيعملوهوش هيعمله الغريب؟؟!!
يمكن تصرفاتك أوقات كتير تكون غريبه ومتسرعه ومش مفهومه ويمكن برده الناس تقول عليك مجنون بس محدش عارف اللى جواك بجد عشان يحكم عليك يمكن تصرفاتك مجنونه عشان مش لاقى حد جنبك تتسند عليه
هناك 4 تعليقات:
كل سنة و انتى طيبة
(( الناس بتقول عليك مجنون بس محدش عارف اللى جواك بجد علشان يحكم عليك )))
(( يمكن تصرفاتك تكون مجنونه عشان مش لاقى حد جنبك تتسند عليه ))
كلمات من القلب فعلا و خصوصا الجمله التانيه اللى بتمس القلب من جوه
تحياتى ليكى رووووووووز
و فعلا مبدعه بجد
صباح الورد أسامه
وأنت طيب يا أسامه ويارب تكون أيام العيد سعاده وفرحه عليك وعلى عائلتك
وربنا يخليك يا أسامه على كلامك الرقيق ده من ذوقك بس
بتمنالك يوم جميل وشكرا يا أسامه لمرورك الجميل ده واللى بجد بيفرحنى :)
مساء الخير روزا
موضوع يستحق ويستحق اكتر انه من قلمك اللي بعتبره مش مجرد قلم لا دا نبض قلب واحساس بترجمه انسانه مليانة مشاعر وحب كبير اتمنى تقابل الشخص الحقيقي اللي يقدره ويقدرها وبالتاكيد ساعتها مش هتتخانقي لانه هيكون ساعتها هو كل اهتمامك والحياة لزمتها اننا اكيد بنقابل اناس زي روزا اللي بتقدر تقول عننا اللي احنا منعرفش نقوله لو حاولنا نعبر عنه
تحياتى لاحلى روزا يسعدنى ديما تواجدى في مدونتك
وكل سنة وانتِ طيبة وبخير وسعادة والسنة الجاية ان شاء الله نباركلك برضه بس على حجات تانية بدعى ربنا يحققهالك
تحياتى وتقديري
زهرة
صباح الورد حياتى
بعتذر عن التأخير فى الرد على
رسالتك الرقيقه جدا دى
و كل سنه و أنتى بألف صحه وسلامه حبيبتى
وبشكرك على كل كلامك الرقيق ده
و مدونتى شرف ليها وجودك
أرق تحياتى
إرسال تعليق