يعنى ايه موبايل؟

موبايل يعنى تليفون ملوش أى لزمه تقفله 24 ساعه وتلاقى الناس بتسألك أنت ليه على طول قافله ولما تقولهم انك مش بتحبه يستغربوا أوى ويجوا بعد كام يوم ويتصلوا بيك 15 مره عشان يسمعوا جمله:الهاتف الذى طلبته ربما يكون مغلقا أو خارج نطاق الخدمه !!!

موبايل يعنى لما الناس متبعتلكش رسايل أبدا ويوم ما تديهم الشركه اللى هم تبعها 1000 رساله ببلاش تكون أول رساله منهم مبعوته ليك أنت صاحب الموبايل المغلق 24 ساعه ويكون مكتوب فيها:أنت فين مش عارف الاقيك موبايلك مقفول طول الوقت ولما تفتحه اتصل بيا ضرورى !!!

موبايل يعنى لما تكون قاعد لابيك ولا عليك وعايش يوم جميل ورايق أخر روقان وتلاقى فجأه حد يتصل بيك ويجيبك من أى مكان أنت فيه وفى أى وقت عشان يقولك خبر مهبب زى وشه

موبايل يعنى لما الشركه الموقره اللى سيادتك تبعها تشغلك خدمه أنت ماطلبتهاش تبرعا منهم ويكون الخدمه اسمها اوصلى شكرا (يعنى أول ماتفتح موبايلك يتبعت رسايل لكل الناس اللى اتصلوا بيك وموبايلك مقفول يتقالهم فيها ان موبايلك دلوقتى متاح ويقدروا يتصلوا بيك ويقرفوك براحتهم !!!

موبايل يعنى لما تشتغل خدمه اوصلى شكرا ومتكونش عارف الخدمه دى بتتوقف ازاى فتفتح موبايلك بسرعه وتشوف اللى عايز تشوفه بسرعه فتتبعت الرساله الرائعه لاصحابك وحبايبك ان موبايلك مفتوح فتروح أنت قافله بسرعه قبل ماهم يستنتجوا ان الرساله دى بتقولهم ان موبايلك مفتوح وتستمر على كده طول الوقت تفتح موبايلك فتوصلهم الرساله فى الوقت اللى أنت تكون قفلت فيه الموبايل فيجيلهم  شعور استنتاجى دفين بأن الشركه اللى سيادتك تبعها مهيسه وبتبعت رسايل غلط وان موبايلك ما اتفتحش ولا حاجه فييأسوا منك ويقرروا ميتصلوش بيك تانى

موبايل يعنى أى رساله توصلك من أصحابك أو أقاربك فيها أى طلب تقيل على قلبك  متردش عليها ولا تتصل بيهم فيسألوك بعد ما الموضوع يعدى بكتييييييير عن سبب تجاهلك ليهم فتقوم تقولهم أصل الموبايل بتاعى مبتوصلوش رسايل مش عارف ليه !!!

موبايل يعنى الناس تتصل بيك ولو موبايلك فى يوم ما كان مفتوح تشوف رنتهم ومتتصلش بيهم وتقفل الموبايل ولما يعاتبوك بعد وقت على كده تقولهم انك ماشوفتش اتصالهم وأكيد فيه تداخل خطوط وترمى بلاك على الشركه اللى أنت تبعها !!!

موبايل يعنى لما الناس تتصل بيك الساعه 12 بالليل وكأن أوقات ربنا بتاعه اليوم كله خلصت فقرروا يتصلوا بيك الساعه 12 عالموبايل بدل مايتصلوا عالبيت ويزعجوا اهل البيت كلهم...لأ بتحسوا والنبى !!!

موبايل يعنى لو عندك مشوار مهم والناس بتتصل بيك علشانك اتأخرت تكون لسه ما نزلتش من البيت لكن تقولهم انك قدامك 3 دقايق وتكون عندهم مع ان الطريق هياخد أكتر من ساعه ونص!!!

موبايل يعنى لو حد بتكرهه أوى وطلب رقمك واحرجت فأديتهوله أول مايتصل بيك تفتح وتسيب الخط مفتوح بدون ماتتكلم وتستمر على كده عشان يكره اليوم اللى عرفك فيه وميتصلش بيك تانى ويمسح رقمك كمان

أنا أحب أبقى حره محدش يقيدنى ويجيبنى براحته من أى مكان أنا فيه وهفضل كده ومش الشىء الصغير ده هو اللى هيقيدنى ويخلينى أحس كأنى بشتغل فى المطافى ومتاحه طول الوقت لكل الناس...قال موبايل قال