زمان كانت الناس فى الأعياد تتصل ببعضها وتزور بعضها ويقعدوا يعملوا كحك العيد مع بعض وكان فيه جو اللمه والأصحاب والجيران وليله العيد ديه كان بيبقى ليها شكل تانى،بتكون يوم مختلف عن بقيه الأيام وبيبقى كل الناس بتزور بعضها وتهنى بعضها ان خلاص بكره العيد
وكنا بنقعد نستنى المفتى يطلع بعد صلاه العشاء على القناه الأولى المصريه وكلنا لهفه نعرف العيد امتى ونفضل نتراهن بهزار مع أصحابنا وقرايبنا ان العيد هيبقى بكره وهم يقولوا لا بعد بكره وكان احساس ان مصر كلها قاعده تستنى زينا احنا وجيراننا قدام التليفزيون فى نفس اللحظه كان احساس حلو أوى
تعالوا شوفوا بقى العيد دلوقتى...
ليله العيد زيها زى أى يوم فى السنه مفيش أى فرق والعيد بنبقى عارفين قبله بكتير هو امتى وباليوم كمان ولحظه مبنعرف ان العيد بكره عادى لابنفرح ولا بنستغرب مهو احنا عارفين من زمان وأغلب يوم ليله العيد بيبقى بنستقبل رسايل عالموبيل من جيراننا وأصحابنا واحنا كمان بنفضل نبعتلهم رسايل العيد
وحتى التليفونات ليله العيد بعد ماكانت مبتبطلش رن بقوا عباره عن تليفونين أو تلاته من أقاربنا وخلاص على كده والزيارات بتاعه زمان انتهت وكل حاجه حلوه مبقاش ليها طعم
هو ابن الايه الموبيل ده هو السبب فى كل المصايب دى وقال ايه
Nokia connecting people
قولوا Nokia distancing people
وشركه موبينيل تقولك اتكلم من القلب ،قولوا ابعت رساله من القلب طيب ياريت يتكلموا مكنش ده بقى حالنا دلوقتى
وشركه فودافون تقولك عيش اللحظه ،محنا بنعيشها واحنا بنتفرج عالرساله المعفنه أم تلاتين قرش لا والناس تبعتها قصيره أحسن تتبعت على رسالتين
طيب كانوا يتكلموا عالتليفون الأرضى مش هيتكلفوا كتير وأهو بدل ما الشركه المصريه للاتصالات قاعده تنتع فى قلبها وتقولكم اتكلم أرضى يا ابن بلدى
دول ياعينى بقوا خلاص بيدللوا على التليفون الأرضى ناقص يجولكم لحد البيوت يبوسوا على رجليكم ولا بلاش رجليكم عشان الريحه يععععععععععع
وقاعدين يقولولكم صوتك بقى واضح أوى عندى متريحوهم بقى وتتصلوا عيب كده الناس تعبت وهاريينكم اعلانات،بس مهو الناس تتكلم ليه وهم عندهم الرساله أم تلاتين قرش المعفنه ومش هتتعب نفسها خالص ده كل الحكايه ضغطه زرار وتوصل
والأجمل من كل ده ان الناس يوم ماتفكر تتصل بيك على موبايلك تتصل عشان تقرفك وخلاص يعنى تبقى قاعد كده لابيك ولاعليك فى أى مكان تلاقى صاحبك بيتصل بيك يقولك أنا كلمتك ملقيتكش أنت فين؟تخيلوا الرخامه؟يعنى هيجيبك هيجيبك انشاله تروح المريخ هوصلك برده وأجيبك من قفاك وأكلمك برده
والجميل ان الشخص اللطيف ده بعد مايحن عليك ويكلمك عشان مكنش لاقيك فى بيتكم وبعد مايقرفك ويسألك أنت فين وتريحه وتقوله مكانك تلاقيه يروح قايلك طيب خلاص لما ترجع البيت ابقى كلمنى...طيب ياغتيت ياتبيت متقول أنت عايز ايه وتخلصنا
ولماتروح وتكلمه تلاقيه عيل أهبل وعايز يدردش يعنى مفيش حاجه مهمه ولايحزنون
وبرده الرسايل اللى تهل عليك وأنت قاعد كده زى كلمنى..شكرا،عارفين مبدأ أبوبلاش كتر منه؟أهو اللى بيبعتوها بيبقوا من النوع ده،وساعات تلاقى حد بيتصل بيك على تليفون البيت وأنت مش طايقه ومش عايز ترد عليه فتبص تلاقيه باعتلك عالموبيل رساله يقولك كلمتك فى البيت وملقيتكش لما ترجع كلمنى (شخص سخيف وبايخ)
ونلاقى ناس من الرخمين دول بتوع أنت فين متصلين بواحد وهو ياعينى عليه متفق معاهم يقابلهم فيقولوله أنت فين؟فيتلخم ووشه يجيب الوان ويضطر يكذب ويقولهم انه يادوب قدامه خمس دقايق ويوصل عندهم وهو يكون لسه فى أول الطريق وقدامه مش أقل من ساعه على مايوصلهم ده لو الطريق كان سالك
اييييييييييييييييييييه...فين أيام زمان..يالا أهو قدرنا بقى
وياريت الرخمين يبطلوا رخامه ويبطلوا رساله أنت فين وكلمنى شكرا واخواتهم ويسيبوا الناس تتصل بيهم وقت متحب،مش غصب واقتدار على رأى أخوكم اللمبى
ليست هناك تعليقات:
إرسال تعليق