بتفكر تسيب مصر؟؟

بتفكر تسيب مصر؟بتفكر خلاص تسيبنا وتبعد؟وتهاجر؟وتتعب وتحط مجهودك وتعبك فى بلد غير بلدك؟بتقول لنفسك الجمله البائسه بتاعه (هى مصر كانت عملتلى ايه؟)

أنا شخصيا بقولك اتفضل سافر بس ياريت متفكرش ترجع مصرتانى مهما حصل لأن مصر مش هتتشرف بوجودك لما تسيبها عشان تدور على مصلحتك فى أى بلد تانى

بس قبل ما أقولك اتفضل سافر عايزه أقولك فكرت فى الحلو اللى فى بلدك قبل ماتفكر فى الوحش؟فكرت لما هتكون لوحدك مين ممكن يسأل عليك؟فكرت لماتكون عيان ومريض فى بيت لوحدك مين هيسأل فيك؟فكرت فى الدفء اللى عشناه (احنا الأجيال الجديده)أيام الثوره لما صاحبك وأخوك وخالك وباباك وجارك وصاحب جارك نزلتوا كلكم وحطيتوا اديكم فى ادين بعض عشان تحموا بيوتكم وركز معايا فى كلمه بيوتكم دى(مش بيتك لوحدك يعنى)

فاكر لما نزلنا ونضفنا شوارع مصر ودهناها ورسمنا عليها علم مصر؟

مش هيوحشك كل ده ؟؟

مش هيوحشك دفء مصر فى أيام رمضان والشوارع اللى لحد الساعه 5 صباحا منوره والناس ماشيه فيها وكأن الساعه 7 مساءا؟؟ولاهيوحشك كلمه من صاحبك فى التليفون يوم الجمعه الصبح لما يهزقك انك لسه نايم ويقولك قوم يالا بسرعه البس صلاه الجمعه فاضل عليها 10 دقايق؟

مش هيوحشك مباراه كوره قدم وفريق مصر بيلعب فيها وتنزل وتلم صحابك واخواتك وتروحوا الاستاد بالاعلام وترسموا على وشوشكم علم مصر وتنادوا بأعلى صوت (مصر...مصر...مصر)

مش هيوحشك يوم ماوقعت فى وسط الشارع واتعورت أو أغمى عليك ولقيت ناس ماتعرفكش  بتشيلك وتوديك المستشفى وتقف جنبك لحد ماتفوق عشان بس تطمن عليك انك كويس؟؟

مش هيوحشك زيارات أهلك فى العيد ودوشه أطفالهم  وبسمه طفل من الأطفال دى وهو بيحضنك عشان بس بيحبك عشانك فيه  بينك وبينه صله قرابه ودم؟

مش هيوحشك لما عربيتك تعطل وتلاقى الف من ينزل من عربياته عشان يحاول يساعدك بدون ماتطلب المساعده دى وهو برده مايعرفكش؟

فكرت فى بياعه خضارالكبيره فى السن اللى على ناصيه شارعكم اللى معندهاش محل ولاحاجه وفارشه فى الشارع وعلى وشها ابتسامه رضا ولما تكلمها وتقولها ايه رأيك ياحاجه فى اللى بيحصل فى مصر تقولك بابتسامه رايقه كده (ربنا يوقف نموهم بتوع التحرير دول اللى واقفين حال البلد )وبعدين ترجع تكلمك وعلى وشها ملامح الاهتمام وتقولك مصر وأهلها هيفضلوا فى رباط الى يوم الدين وان شاء الله ربنا هاينصرنا على من يعادينا وتروح نازله دمعه جميله كده من عنيها

نسيت يوم ماكنت مكتئب وقاعد تعيط واتصل بيك صاحبك قالك عدى عليا نقعد ونتكلم عشان أعرف مالك ومجرد ماقعدت معاه 5 دقايق هديت ورجعتلك ابتسامتك ونزلتوا تاكلوا كوزين دره على شط النيل؟

بلاش كل ده مش هتوحشك اللهجه المصريه؟وخفه دم  المصرى حتى لو فى عز الأزمه؟

مش هيوحشك لما تكون منتظر فى مستشفى مثلا ومستنى معادك مع الدكتور وتلاقى الناس تيجى تقعد جنبك وتتكلم معاك  فى أحوال مصر وفى الأخر تسلم عليك بمنتهى الحب وتتمنالك الشفاء مع انهم مرضى زيك؟؟

على فكره كل أسئلتى دى مش عشان أمنعك من السفر سافر لوعايز وسافر لو مصر تهون عليك أوى كده  بس بترجاك تفكر قبل ماتسيب مصر عشان بجد مصر محتجالك فى الوقت ده أكتر من أى وقت ،اعتبر مصر زى أمك فتفتكر لو أمك مريضه هل ممكن تسيبها وتسافر كده بسهوله؟

ممكن كل أسبابى اللى فاتت دى تكون بالنسبالك أسباب تافهه مش مهم المهم انك تفكر فى مصر ...بلدك ...قبل ماتفكر فى نفسك