البطه والفرقع لوز

البطه والدبه والصرصار والبقره والفرقع لوز ديه كلها حيوانات وطيور وحشرات
بنشبهها بحاجات كتير فى حياتنا
تسألونى ليه أقولكم معرفش بس احنا لما نيجى نشبه ناس هنموت ونتريق عليهم
لاااازم نشبهم بحاجه من الحاجات اللى فاتت دى

تقولولى ونتريق عليهم ليه أصلا أقولكم احنا كده نحب نتريق وخلاص حتى لو
الشخص اللى قدامنا يجنن ومفيهوش أى حاجه تخلينا نتريق ،وقال على رأى المثل
ملقوش فى الورد عيب قالوا أحمر الخدين

تلاقى كده الست الأروبه أم مناخير طويله اللى بتكون فى العقد التاسع من عمرها
قاعده دايما قدام التليفزيون تعمل تريكو قدام المسلسل اللى بتحبه
وعاده بتكون الست الأروبه ديه بتتابع مسلسل نور ومهند عشان تفتكر جدو اللى
مات صغير واتخطف فى عز شبابه ومات وهو عنده ميه وعشرين سنه بس…فعلا
اتخطف

تلاقى بقى الست الأروبه قاعده تتفرج زى ماقلنا على مسلسل نورالتركى ده وتقول للواد بقلظ ابن اختها اللى عنده عشر سنين تعالى ياواد افتحلى التليفزيون عالمسلسل وتبدأ فى متابعه أحداث المسلسل وفجأه تروح قايله شوف ياواد يا بقلظ نور دى أموره أوى بس هى رفيعه شبه الصرصار لو تتخن شويه

وتقلب عالقناه الأولى تلاقى فيلم لممثله مصريه وبلاش ذكر أسماء عشان متسجنش
والمدونه تتحذف للأبد المهم تروح قايلالك الممثله دى كل متكبر تحلو
بس هى شكلها بطه شويه لكن أهى حلوه برده

وتلاقى بنت أختها تعدى عليها فتخلى الواد بقلظ يفتحلها الباب
فتروح الست الأروبه قايلالها ايه الطعامه ديه يا بت
بس لمى نفسك فى الأكل شويه بقيتى شبه الدبه

ولما يطب على العيله دى ضيف فجأه ويخبط عليهم بدون ميعاد
تروح الست أروبه تقول مش تقول يخويا انك جاى ولا تنط عالناس
فجأه كده زى الفرقع لوز

ولما يجى عم الفرقع لوز يتكلم يحس ان كل البيت مش طايقه
عشان جالهم فجأه تقوم الست أروبه تقوله طيب بس بس بس أسكت
صوتك عامل زى صوت البقره مش عارفه أسمع المسلسل منك

وعلى كده دايما تلاقى الست الأروبه ست مرحه طبيعيه تلقائيه كلماتها من قلبها
ومتسيبش حد فى حاله الا لما تطلع عليه لفظ
حيوان أو حشره أو طير…هى بتفرح كده