تخنتى شويه؟؟؟

ملحوظه:الموضوع تمت كتابته فى صباح يوم العيد منذ حوالى سنه

طبعا كلنا متظبطين وهاريين نفسنا كوافيير وباديكير ومانيكير وماسكات للبشره وصبغات للشعر عشان ننزل واحنا أخر شياكه
اللى هتروح لقرايبها واللى خطيبها عازمها عالسينما والغداء بره واللى هتخرج مع جوزها عشان يروحوا لعيلته او عيلتها واللى هتخرج مع صحباتها

لكن أيا كانت ظروفك أنسه أو زوجه أو مخطوبه فكلنا انهارده بالذات وعشان أول يوم العيد هننزل واحنا متزوقين ومتشيكين ولابسين ومتأنتكين وأخر طعامه وحلاوه

لكن عشان انهارده أول يوم العيد قررت انكم يا بنانيت مسؤلين منى مسئوليه الأم عن أطفالها اللى فحضانه وكان لازم أنصحكم كام نصيحه عالماشى كده قبل ماتنزلوا فى يوم زى ده وتتصدموا فى الحياه

واعتبروا كلامى ده زى الوصايا العشر كده
تحطوه حلقه فى ودانكم عشان يعدى اليوم على خير
أول ماهتنزلى من بيتكم عالصبح كده هتصطبحى بوش جاره من جيرانك اللى بيموتوا فيكى (بتوع ياروحى وحشينى أوى تعالى لما أبوسك)
وطبعا جارتك دى هتقف معاكى مش أقل من عشر دقايق ولكن …..
فى العشر دقايق دول هتبخ فى وشك كميه سم مش طبيعيه تنكد عليكى اليوم بحاله وتشيل ثقتك فنفسك وتحسسك انك أم قويق واقفه قدامها
هتقف معاكى جارتك الرقيقه دى وبعد ماتهريكى بوس (دليل على انها كانت مفتقداكى ومن كتر افتقادها ليكى كان هاين عليها تقعد على باب العماره يمكن تقابلك وتتملى بطلعتك البهيه)
وبعد ماتخلص بوس هتبصلك برقه شديده كده وتقولك :
انما ايه القمر ده احلوينا اوى بسسسس………أنتى تخنتى شويه؟؟؟؟؟؟؟
(قال يعنى بتسألك بحب وان مش قصدها حاجهملااااااك ماشاء الله عليها)

طبعا أنتى ببراءتك المعهوده هتقوليلها:
ايه ده بجد؟تخنت؟أوى يعنى يا طنط؟

أو هتلجأى للدفاع عن نفسك وتقوليلها لا ياطنط ماتخنتش بالعكس ده أنا خسيت
وهتبقى من جواكى بتقولى لنفسك (هو أنا فعلا تخنت؟؟؟)

نفس الحوار اللى فات هيحصل مع صاحبتك اللى أول ماتشوفك ووهى بتبوسك وتاخدك بالحضن وهتقولك:
خسيتى جدااااااا بسسسسسسسسس……………..وشك خاسس كده ليه؟
وهيبقى الحوار ده فى نفس يوم مقابلتك لطنط جارتك اللى قالتلك انك تخنتى وهتلاقى من صاحبتك نفس نظره البراءه بتاعه جارتكم وهى بتسأل السؤال بس فى فرق صغير وهو ان صاحبتك وهى بتقولك ان وشك خاسس هتقولها باستياء وحزن وداخل معاهم رقه برده وكأنها صعبان عليها انك وشك خاسس اوى كده(ياحرررام )

وهتقابلى كمان صاحبه ليكى أو جاره فى سنك هتقولك:
كل سنه وأنتى طيبه يا قمر بسسسسسسسسس……فين لبس العيد؟؟؟؟
وكأنها كانت كل يوم بتقعد تفلى دولابك بلوزه بلوزه وبنطلون بنطلون وعارفه كل اللبس اللى عندك
ولو قولتيلها ان ده لبس العيد فكرك هتسيبك؟؟؟؟
طبعااااااا لا
هتقولك ببراءه الاخوات اللى فاتوا :
ايه ده بجد؟؟(وملامح الدهشه والاستغراب هتبقى بتنط من عنيها)
أصلى افتكرت ان مش ده لبس العيد،اممممممم (تفكير عميق ولا نيوتن )وهتقولك عندك حاجه شبه الطقم ده تقريبا
وعشان براءتكم اللى بتنط من عيونكم يا بنات واحساسكم المرهف اللى ممكن يخليكوا بكلمه تكتئبوا وتتحطموا نفسيا ياعينى عليكم
هديكم قاموس للتصرف فى المواقف دى
بس قبل القاموس هقولكم على حاجات لازم تعرفوها

أولا:طنط جارتكم مش معنى انها أخدت لقب (طنط) انها ملاك برىء ومش بتغير منك وتحقد عليكى
وان ماكانتش بتحقد عليكى عشان نفسها هتحقد عليكى عشان أنتى أجمل أو أشيك أو أطعم من بنتها ولو معندهاش بنت يبقى أنتى أجمل من مرات ابنها المهم انها لازم تحقد وخلاص (غل وسم جواهم كده بعيد عن السامعين)

ثانيا:صاحبتك أو جارتك اللى فى سنك اللى هتقولك وشك خاسس أو الطقم ده قدييييم؟أمال فين لبس العيد؟
دى بقى غيرانه منك رسمى ومش لاقيه حاجه تغيظك بيها وتحرق دمك فبتقول أى كلام عشان تضايقك وخلاص المهم انك متمشيش من معاها الا وأنتى متنكده وكارهه منظرك ومش بعيد تقولى لنفسك يعنى هو انا حتى فى عز شياكتى برده شكلى وحش أوى كده؟(طيبه وهبله أنتى)
وصاحباتك دول بيعملوا بمثل(مالقوش فى الورد عيب قالوا أحمر الخدين)
أما بقى قاموس التصرف فى المواقف دى :

أولا:جارتك هتقولك على انك تخنتى
تقومى أنتى تغيرى الموضوع لأنها برده ست كبيره وعيب تكلميها وحش
وعشان يبقى معاكى كلمتين تقلبى بيهم الموضوع قوليلها:
عموما ياطنط فرحانه انى شفتك وعيد سعيد عليكى وسلمى وامشى (قال يعنى كأنك مستعجله)

ثانيا:صاحبتك بتاعه وشك خاسس أو بهتان أو شكلك تعبان او أى كلمه شبههم قوليلها :
تصدقى أنا برده لما شوفتك كنت لسه هقولك انك وشك شكله بهتان كده ومرهق
ابقى نامى كويس بقى عشان يورد كده ويبقى حلو (بريئه ياختى عليكى)

ثالثا:صاحبتك اللى هتقولك فين لبس العيد
هتقوليلها هو ده لبس العيد بتاعى وبعدين دردشى فى أى موضوع وتروحى قايلالها
البلوزه اللى أنتى لابساها دى حلوه أوى (هتنشكح هى وتفتح بقها من كتر الغرور)
تقوليلها بسسسسسسسس…… ضيقه شويه ومبيناكى تخينه شويه (أهم حاجه نظره البراءه من عنيكى)

رابعا:لو صاحبتك بقى مش طنط جارتك هى اللى قالتلك تخنتى شويه؟؟؟
قوليلها:أنتى برده تخنتى عن أخر مره شفتك فيها
هتدافع عن نفسها وتقولك بالعكس أنا حاسه انى خاسه
قوليلها لااااا أنتى متلاحظيش اللى يلاحظ اللى يكون مشافكيش بقاله كتير 

بصوا يا بنات الموضوع ده مش المقصود بيه الشر ولكن أنا زى كتير جدا منكم كان فى ناس بتحرق دمى وتزعلنى فى يوم جميل زى يوم العيد ده وكنت مش بعرف أرد عليهم وأحس انى زعلانه طول اليوم عشان فقدت ثقتى بنفسى بس مقابل البنات اللى قلوبهم مش ولابد كان ليا صاحبات بعد ما يتنكد عليا وأقابلهم وحتى بدون ما أسألهم عن مظهرى يقولولى رأيهم وان شكلى انهارده كويس أو ..أو ..أو

فعايزاكم تعرفوا ان محدش هينتقدك الا اللى بيغير منك وشخصيتين بس فى الحياه دى كلها اللى لو انتقدوكى تقبلى نقدهم بحب لأنك واثقه من حبهم ومشاعرهم نحيتك وهم (مامتك وصاحبتك الأنتيم)
ومش معنى ان فى ناس بتغير منك انك تخلى الغرور يدخل جواكى ولكن فى ناس كده نفوسها مريضه ومبتحبش الخير لحد ولا بتحبلهم السعاده
وتعالى نفترض انك تخنتى (افتراض يعنى عشان محدش يضربنى)
بسييييييييطه جداااا تعايشى مع انك تخنتى واختارى لبس يتناسب مع تخنك لحد ما تعملى ريجيم وتخسى وترجعى للبسك الروش تانى وبعدين ماهو فى شخصيات بتبقى مليانه شويه بس أموره جدا زى الهام شاهين وليلى علوى وبيختاروا لبسهم كويس فبيظهر جمالهم
مش لازم لو تخنتى تحسى نفسك أم قويق بالعكس ممكن تعملى حاجات تخليكى تحسى انك ملكه وزى القمر كمان زى انك تختارى لبس غوامق يدارى تخنك لحد ماتخسى
وتكونى أنيقه بالاكسسوارات الملونه والشنط والجزم المدندشين والماكياج الرقيق لحد ماتخسى وترجعى للبسك اللى بتحبيه
وافتكرى حاجه بقولها دااااايما وهى ان مفيش بنت مش جميله أبداااااااااااااااا ماتنسوش الكلمتين دول أنتى جميله من جوه ومن بره مهما كنتى مش واثقه فنفسك ولكن أنتى فكل الاحوال جميله وثقتك بنفسك دى حاجه ترجعلك لكن جمالك موجود دايما بيضا أو سمرا، طويله أو قصيره ، تخينه أو رفيعه أيا كنتى فأنتى جميييله
صباحكم سعاده