ليه تتجوزى لما ممكن متتجوزيش؟

بنات كتير أوى بيحلموا بالفارس أبو حمار أبيض والفستان أبو ديل أبيض عشان يتناسب مع الحمار (بتاع الفارس ماتفهومنيش غلط)اللى هيجى ويطلعلها البرج العالى ويخطفها لبيت الزوجيه السعيد(أخدينلى بالكم من السعيد دى؟)

وتفضل البنت تحلم تحلم تحلم لحد مايجى اليوم ودماغها تفرقع لما كل الأحلام تطلع أوهام والفارس أبوحمار يطلع (عيل سيس)

مين هو بقى العيل السيس ده؟

العيل السيس هو المفروض انه راجل ،فى شهاده الميلاد كتبوله كده (الجنس ذكر) بس للأسف شخصيته مطلعش ليها علاقه بنوعه ،يعنى راجل ميعرفش يتحمل مسئوليه وأهله بيتحكموا فيه وفى بيته حتى بعد الجواز

فى نوع تانى من العيال السيس بيسموا نفسهم طموحين وأهلهم كمان بيأكدوا لكل من هب ودب ان ابنهم ده ماشاء الله ماشاء الله (رقاصه)قصدى طموح

بس هو طموح ازاى بقى؟أقولكم:

الشاب الطموح ده يتجوز واحده عائلتها أغنياء وبيبقى واخدها أصلا عشان بعد الجواز هتكتبله كل حاجه باسمه ويبقى شال الجمل بما حمل والا…..يسبها ويطلقها

ولأن أى بنت بتخاف من كلمه طلاق دى (مش ذوبان فى حلاوته يعنى)ولكن لأنها كلمه معناها انها مش هتعرف شكل حياتها ازاى بعد ماتتطلق

أهى قبل ما تتجوز كانت بنوته شقيه وعامله زى الفراشه والكل بيعاكسها وعارفه انها حلوه وطعمه وكتكوته لكن بعد ما تتجوز هتبقى 220 كيلو وهتبقى مدهوله وشعرها مضروب فى الخلاط ومقشف زى سلكه المواعين ووشها هتضرب فيه التجاعيد من كل ناحيه من كتر الهم والغم والنكد

فبتحاول تمشى عجله الحياه وترضيه وتكتبله اللى هو عايزه عشان ماتطلقش(شفتوا ازاى شاب طموح؟)

هو طموح برده لكن بيعيش على قفا غيره لكن بصراحه أهله ماكذبوش لما قالوا انه طموح

نيجى للبنات اللى عاملين زى البسكوته اللى بيقعوا فى دايره الحب ويفضلوا يحبوا ويحبوا ويقولوا ان حياتهم مستحيله بدون اللى بيحبوه وانهم لو ما اتجوزوش الانسان ده هيموتوا نفسهم ويفضلوا عالحال ده لحد ما تجيلهم انتكاسه ويلاقوا أصحابهم بيقولوا عليهم (بيبو فرقع جيجى)

الغريب بقى ان بيبو دايما بيفرقع جيجى لأن الدنيا مليانه جيجيهات فمجتش على جيجى دى اللى يكمل معاها

وتدخل البنت بقى (المصحه النفسيه)واللى بيشكل أعضاءها الاخوات والأقارب والأصحاب والجيران وجيران الجيران وأخوها الولد ويمكن أصحابه كمان (زى اخواتها يعنى)وفى الأخر انتقاما من حبيبها اللى فرقعها تتجوز واحد مبتحبوش وتعيش تعاسه فى تعاسه وتكره حياتها وحبيبها الأولانى وجوزها التانى وتخلف وتكره حياتها برده لأنهم مش من انسان بتحبه وفى الاخر تطلق وتاخد العيال تشحت بيهم

فالسؤال بقى:ليه تتجوزى لما ممكن ما تتجوزيش؟

عشان ميبقاش اسمك عانس؟طيب ماتعنسى بس تعيشى ملكه وأموره وكتكوته لا جوز يهمك ولا عريس يلمك ولا حد يقرفك ويقولك فين الطبيخ (يا أمينه)والملح بتاع الأكل ناقص والبنطلون بتاعى ما اتكواش ليه؟وفين فرده الشراب الأخضر؟والبدله كلمى المكوجى يجيبها وكأن هو ملوش صوابع وبق(فم يعنى)عشان يكلمه هو

والشبشب اتقطع لما تنزلى شوفيلى شبشب تانى يكون اسود وعليه خط برتقالى(بيتأمر كمان)ده بدل مايقولك كتر خيرك يا أمينه(مرات سى السيد)على انك فكرتى فيا وجبتيلى شبشب الهنا ياروحى ياعمرى ياعنيه

ولا حماتك هتبقى عقربه وتوقع بينك وبينه وتخليه يقرفك فى الرايحه والجايه بأفكارها اللى عامله زى السم والملح الانجليزى ،وتفضل تقوله مراتك قالتلى ازيك وهى بتبصلى بقرف (مع انك تبقى ياعينى عليكى عاصره على نفسك 80 كيس ليمون عشان تكلميها كويس)لكن برده لازم تطلعك الساحره الشريره أم مقشه

وأااااااااااااااااااااه لو جوزك اخواته بنات هيعاملوكى معامله مرات الأب وكأنك خطفتى الملاك الحارس بتاعهم من وسط البيت وخلتيهم يعشوا من غير ملاك

هتقوليلى لا بس برده الجواز مهم عالاقل عشان لما اروح فرح بعد كام سنه ميبقاش اسمى عانس ويبقى فى ايدى كوز دره أدخل بيه واتفشخر بيه قصاد الناس وهنا بقى هضطر أقولك اللى مكنتش عايزه أقوله

بصى يابنتى ليه تفكرى انك هتبقى شكلك وحش لما تدخلى فرح بدون (جوز) بالعكس أنتى تشفقى على العروسه اللى الله يكون فى عونها عشان هتتجوز،دى هتتمرمط وتمسح وتكنس وتطبخ وتبقى عامله زى اللى بيشتغلوا فى أعمال السخره (لا هتلاقى كلمه عدله تتقالها ،لا شكرا ولا حاسس ياحبيبتى انك تعبانه ارتاحى وكملى بكره ولا بوسه رقيقه ولا حتى وحشتينى ،ولا الللللللللله الأكل يجنن تسلم ايدك ،هتلاقى فرده شراب مقلوب داخل البيت لا أهلا ولا سهلا ولا جبتلك الفراوله والموز ياحبيبتى اللى بتحبيهم ياقردى الصغنن عشان تاكليهم وتتبسطى بعد تعبك فى الغسيل والمسح والطبيخ)

وبعد كللللللللللللللللللللللللللللللللللل ده عايزه تتجوزى؟

لو اتجوزتى خلاص(ربنا يتولاكى خلاص هتبقى خرجتى من دائره تخصصى)ولو ما اتجوزتيش احمدى ربنا وبوسى ايدك وش وضهر وادعى انك متتجوزيش أبدا عشان تفضلى حبوبه ولطيفه وفراشه لححححححححححد أخر يوم فى عمرك