أنا بنت ...يعنى كنت كائن رقيق...بس بعيد عنكم اتحولت
وبدل ماكنت زى بوسى فى فيلم حبيبى دائما وروز فى فيلم تايتانيك
بقيت نسخه طبق الاصل من زينات صدقى وهى بتدلق الملوخيه على راس عبد السلام النابلسى وتردحله الردحه المصريه الأصيله وتقوله (أنا الأنسه حنفى؟؟؟
يامهدى الى الحديقه يا وارد أفريقا)
عايزين تعرفوا ليه؟؟؟
تعالوا أحكيلكم القصه......
يااااااه هقابل هيثم انهارده
هيثم ده خطيبى حبيبى راجلى
راجل كده مفيش زيه اتنين
قوى،عنده شخصيه،حنين
بيعجبنى فيه انه كتوم مع كل الناس الا أنا
أااااه ياحبيبى ياهيثم
كل مابتكلم عنه بحس انى نفس الوقت يمر بسرعه عشان أقابله
لسه 5 ساعات بحالهم على معادنا
حاسه انى هتجنن
بينى وبينكم أصله وحشنى أوى بقالى يوم و4 ساعات وتلت ثوانى مشفتوش
ترررن تررن
ده هيثم حبيييييييييييييييييبى
أنا: هاااااه...الو (هاااه هى تعبير مسهوك بناتى أصيل)
هيثم: ازيك ياروحى وحشتينى
أنا: وأنت هااااه كمان
هيثم: يلا ياحبيبتى انزلى أنا مستنيكى تحت بيتكم
أنا : نازله حالا حالا.....هيثم....مش هتأخر عليك أبدا
هيثم: تحبى نروح فين؟
اللى يعجبك المهم انى معاك
هيثم:أنا متضايق أوى انهارده أنتى عارفه انى مبحكيش لحد غيرك
أنا :عارفه ياروحى انك كتوم احكيلى مالك
هيثم:حاسس انى لوحدى...حاسس ان محدش مهتم بيا غيرك أنتى
بحس ان كل أهلى مش مهتمين بيا زيك أنتى ياروحى ياعنيا
عارفه ياقلبى؟؟أنا زمان كنت بحكى اللى جوايا لماما
لكن حسيت انها مش بتسمعنى باهتمام
ومن ساعتها مبقتش أحكى وبقيت كتوم زى ما أنتى شايفه
وعمرى مافتحت قلبى وبدأت أحكى الا ليكى
(مسك ايدى وسبلى بعنتينه الحولانين....اللى كانوا فنظرى ولاعيون توم كروز
وقالى بحبك...تخيلوا؟قالى بحبك...ياحبيبى ياهيثم)
اليوم اللى بعدها هيثم اتصل بيا ولأنه راجل أوى زى ماقولتلكم كرامته متسمحلوش انى أخرج الا لما أعرفه خط سيرى
وكنت خارجه مع ماما أشترى بيجاما وقولتله وطلب منى لما أرجع أطمنه وأقوله عملت ايه...حبيبى هيثم بيهتم بأدق التفاصيل الصغيره بتاعتى
وأول مارجعت كلمته وحكيتله جبت ايه ورحنا فين وجبت البيجاما بكام ونمت بعد ماسمعت صوته الرومانسى الرقيق
اليوم اللى بعدها الصبح
تررن تررن...
أنا: الو....أيوه ياطنط (والده خطيبى)
والدته...ازيك ياحبيبتى
أنا: بخير الحمد لله ياطنط
والدته...قوليلى جبتى البيجاما امبارح؟؟؟
أنا: صدمممممممممممممممه.....سكوت....أيوه يا طنط
والدته...وكان لونها أحمر فاتح ولا أحمر غامق؟؟
أنا: الصدمه رقم 2....سكوت....غامق ياطنط
والدته....بس ياحبيبتى سعرها غالى شويتين ماكنتى تستنى الاوكازيون أو تشتريها من الموسكى (سعرها أرخص يعنى بتلت مرات)
أنا: صدمه رقم 3....معلش ياطنط
بعد ماقفلت السماعه اتخرست ولسانى اتلوح
هو ده الكتوم؟؟؟حكى لمامته عن مشوار ملوش أى أهميه زى مشوار البيجاما ولونها وكمان سعرها؟؟؟
ابتدى الفار يلعب جوايا وقعدت أقول اللهم اغزيك ياشوشو وطنشت
بعدها بأسبوع خرجنا
هيثم: أنا عارف انك بتحبينى أصل أنا حلم كل فتاه
أنا:مش لازم تتغر يعنى ياهيثم
هيثم:ياحبيبتى مهو أنا لو مش حلم كل فتاه مكنتيش حبتينى ووافقتى تتخطبيلى
أصل أنا عريس لقطه
أنا:صح ياهيثم بس أنا موافقتش عليك عشان عريس لقطه أنا وافقت عليك لأنى حبيتك
هيثم:بس ده ميمنعش انى عريس لقطه
بعد أيام ...
هيثم:متخلى باباكى يجيب فستان الفرح أصل مصاريفنا كتير بتاعه الجواز
بعد اسبوع....
بابا اتصل بهيثم وقاله هات اللى تقدر تجيبه ومتقلقش هساعدك فى أى حاجه تكون ناقصاكم
بس مش لازم تعرف أهلك بالكلام ده ،دى حاجه بينى وبينك
بعد ساعه ...
والد هيثم كلم بابا وشكره على مساعدته لابنه واتمنالنا حياه سعيده ...صدمه رقم مليون
أخر مقابله بيننا....
هيثم:فيكى حاجات كتير محتاجه تتغير ومش عجبانى
يعنى مثلا ....
ولسه هيبدأ رحت قايلاله ستووووووووووووووب
لأ لأ لأ لأ بص ياعنيا ،أنا لا أى أى ولا زى زى ولا كل قط يتقاله يامشمش
بص ياعين طنط أنت ياننوس عين ماما
فتح عنيك عدل وبحلق كويس وشوف بتكلم مين
أنا سيد سيد سيدك يتمنانى لولا زفاره العين بصيت لخلقه عيل تيييت زيك
اجرى ياحبيبى أمك بتنده عليك وقال على رأى المثل يامصبر الوحش عالجحش
وعلى رأى المثل قليل الأصل لاتعاتبه ولاتلومو ده زى البقعه لاتطلع برابسو ولا بأومو
ليست هناك تعليقات:
إرسال تعليق