يقترب..يقترب..ده قرب خلاص

يااااااااه لو تعرفوا خيالنا الواسع الخصب ده يوصلنا لفين ويعمل فينا ايه ويحرك كل حاجه فى الكون حسب تفكيرنا بشكل كبير قد ايه

اتعودت كل يوم ان البواب بتاع العماره يحطلنا الجرايد كل يوم الصبح فى الباب وبعد ما ينزل بفتح الباب أخد الجرايد

وعودتنا كمان واحده جارتنا فى العماره انها عندها هوايه سرقه الجرايد وبالرغم من سرقتها لجرايدنا كل يوم الصبح تقابلنا بالاحضان بالاحضان والحب والبوس والابتسامه وتحسسنا انها نفسها تنام جنبنا عالسرير من كتر مشاعرها الفياضه لينا (أنا وبابا وماما طبعا)

وكمان جارتنا دى بتشتغل فى منصب مرتبه أكتر من ممتاز وطول الوقت تتمنظر على خلق الله انها عندها وعندها وعندها وانها بتشتغل فى مكان ممتاز وكمان هى عندها عربيتين وولادها فى مدارس لغات وبتسرق الجرايد شوفتوا مصيبه أكبر من كده

وبعد فتره طويله من سرقه جرايدنا وحيل مختلفه بأشكال وأنواع فشلت كلها مع جارتى اللئيمه اللى بتعرف تسرق الجرايد امتى قبل منفتح الباب وناخدها وكأنها كانت بتدرس الاوضاع كلها قبل ماتقوم بحيلها الخبيثه دى زى فيلم لصوص ولكن ظرفاء كده بتاع أحمد مظهر وعادل امام

ولكن احنا كنا أذكى منها اتفقنا مع عم فتحى البواب يحط الجرايد ويستخبى عشان نعرف مين اللى بياخد الجرايد وفى النهايه عرفنا وطبعا مقولنلهاش لاننا ناس ذوق وعندنا دم ومبنعرفش نجرح حد لكن لحسن الحظ قفشنا بنتها الصغيره مره وهى بتجرى عالسلم بعد ما خطفت الجرايد ومن ساعتها مفكروش يسرقوها تانى وقالوا توبه من دى النوبه وقال على رأى المثل (ان كان فى العمود عيب يبقى الأساس فى القاعده) بنتها بتسرقلها الجرايد عيله متأسسه صح

لحد هنا وكل شىء كويس والخيال بتاعى نايم ومتغطى وبيشخر كمان

لكن جيت فى يوم الصبح سمعت صوت خروشه كده عند باب الشقه فقلت الجرايد حطها البواب وكالعاده بفتح الباب لقيت الجرايد …..مش موجوده

طبعا أول حد جه على بالى ميييييين؟جارتى اللئيمه طبعا ومفيش غيرها

لكن جه فى بالى كمان ان فيه شقه ايجار سكنت معانا فى نفس الدور وانهم ميعتبروش جيراننا وحظهم انى لما فتحت باب شقتنا سمعت باب شقتهم بيتقفل يبقى اييييييه الشك بقى حولين جارتى اللئيمه والشقه المسكونه جديد

فضلت أقول لنفسى خليكى يابت ياروزا ورا الباب وأول متلاقى حد جاى عند الباب افتحى الباب فجأه وخضيه وامسكيه متلبس بأداه الجريمه (الجرايد بتاعتنا)

وفضلت رايحه جايه ورا الباب ولا الشاويش عطيه نفسه مستنيه المجرم لما يجى ومرتبه سيناريو وحوار طويل عريض وكلام يوجع أديه للحرامى فى وشه يجرحه ويحسسه بتأنيب الضمير وكمان يكون صوتى عالى عشان فضيحته تبقى بجلاجل والأصعب هنا انى كائن مبيحبش الخناقات والمشاكل خالص لكن على رأى المثل (الايد اللى تتمد ولا تضربش تستاهل القطع )وحتى بحس انى لما بزعق بيبقى شكلى كوميدى شبه القط اللى فى كارتون توم وجيرى لما يزعق ويعمل مقالب فى الفار والفار يلبسه المقالب كلها ويطلع زى الشعره من العجين وميحصلوش حاجه

المهم بعد انتظار طويييييل وتحضير أطول لسيناريو تعليه الصوت وقله الذوق اللى هعملها مطالبه بحقى فى عدم سرقه الجرايد بتاعتنا

سمعت صوت باب الشقه المتأجره فى دورنا بيتفتح ………تاتاتا…..قلت أكيد حسوا بتأنيب ضمير وهيرجعوا الجرايد مكانها بس لازم أزعق عشان ميكرروهاش تانى

فضلت مبحلقه من العين السحريه بتاعه الباب لقيت الراجل جاى بيقرب….بيقرب…بيقرب من باب بيتنا عشان يصلح غلطته ويحط الجرايد مكانها وأول ما قرب جداااااااا رحت فاتحه الباب ولسه هزعق لقيته واقف مستنى الأسانسيرومدينى ضهره ومفيش فى ايده أى جرايد ولا ورق ولا أى أداه جريمه وكمان من زوقه مبصش وراه لما فتحت باب الشقه ………..اتكسفت وقفلت الباب وقلت لنفسى ايه الكسفه دى ده قله الأدب كانت على طرف لسانى الواحد هيفضل ذوق لحد امتى وحتى لما قررت أكون قليله الذوق الناس بقت محترمه

بس أقولكم حاجه؟ ………يظهر ان العين السحريه كانت بتقرب الرؤيه أكتر من اللازم لان الراجل كانت خلاص مناخيره هتخبط فى الباب ساعه ما فتحت الباب لكنى لقيته بعيد يجى بعشر خطوات

قلت لنفسى ولا هتضايق ولاهتعصب الشقه التأجير طلعت بريئه يبقى أكيد جارتى اللئيمه بتشوف حاجه فى الجرنان وهترجعه تانى عشان خلاص عرفنا انها حراميه فمش هتحب تعمل مشاكل لنفسها ومش عشان سكتنا مره يبقى هنسكت كل مره

وفضلت لازقه فى الباب مستنيه المجرم وكأن حد داس عليا طبقنى فبقيت جزء لايتجزأ من بابنا الحبيب

وفجأه……..سمعت صوت الأسانسير طالع واتفتح باب الاسانسير قلت بسسسسسسسسسسسس……..جت لقضاها

لقيت عم فتحى البواب بيحط الجرايد فى الباب………يظهر انها اتأخرت شويه انهارده…..يالا دع الخلق للخالق وملناش دعوه بحد وان بعد الظن اثم……صحيح ياولاد قال على رأى المثل اللى يخاف من العرسه مايربيش كتاكيت