الصبح شربت كبايه كابتشينوكبييييره..ايوه ابو رغوه ده اللى بيمسك فى المناخير
ويعمل شنبات هو ده،المهم كنت بشرب كبايه الكابتشينوالمتين دى
فى النادى ووأنا قاعده لا بيا ولا عليا لقيت مجموعه من
الشباب جايين قعدوا على الترابيزه اللى جنبى وسمعتهم
قاعدين يتكلموا بطريقه بيس يامان وقشطه وكبر دماغك
وانزل من على ودانى والكلام الغريب ده وفجأه….
لقيت شاب هالل على الشباب دول وواحد من اللى قاعدين
زغد صاحبه فكتفه وقاله النجم جالك اهو وكلهم قامو يسلموا
عليه…..بينى وبينكم لقيتنى لا ارادى وجهت الاريال نحيتهم
وودانى اشتغلت بنسبه ميه فى الميه وبدأت المع أكر…
النجم قعد ،كانوا كلهم بيسلموا عليه بلهفه وشوق غريب
أتارى الننوس كان لسه راجع من بورتو غالب..
كان فى مصر يعنى مكنش محتجز فى اسرائيل ولا الجزائرولا
كان محكوم عليه بالسجن عشرين سنه يعنى لو كان واحشهم
كده كانوا خطوتين ويبقوا عنده
قعدوا يتكلموا ويهرجوا لمده لا تزيد عن دقيقتين وبعدين
افتتح واحد صاحبهم الحواروسأل النجم قولنا بقى عملت ايه فى حفله… بيونسيه ؟
النجم بدأ يتمرع وفشخ بقه عالاخر ورجع بظهره كده لورا
وكأنه سياده وزير الخارجيه وهيدلى بدلوه فى قضيه هامه
وحساسه وخطيره وراح قايلهم……كانت مزه جامده اخر
حاجه مش زى الصنادل اللى عندنا!!!!!!!!!!!…..قلت لنفسى
مهو لو الصنادل اللى عندكوا لو كانوا بصوا لبراد بيت
وريتشارد جير كانوا هيشوفوكم شبشب زنوبه ومن غير
فيونكه كمان ورجعت كتمت فقلبى وكملت فرجه وتلميع أكر
…….ببص لقيت الكل مفنجل عنيه عالاخر وكأنهم
بيسمعوا بعنيهم مش بودانهم كانوا شبه البشر اللى بيجوا فى
اعلانات روتانا سينما مش هتقدر تبربش عنيك….وفضل
يشرحلهم ازاى دخلت بيونسيه المسرح وازاى الناس
استقبلتها وكانت لابسه ايه ….وراح قايلهم بزهو كده
عارفين يا شباب دى شكرت جدا فى ديكورات وتنظيم الحفله
وكأن الحفله دى مدفوع تكاليفها من جيب السيد والده مثلا
بينى وبينكم تعبت نفسيا وقررت اقوم امشى ….
ومسكت المنديل…..ومسحت الشنبات اللى كان عاملهالى
الكابتشينو ولا شنبات ملك الغابه وقررت أشد الرحال
واقوم امشى…ووأنا فى طريقى لبيتنا قعدت اقول فى سرى
الهى وانت جاهى كل صندل وطنى من صنادلنا يبص لمزه
غير وطنيه ….أقصد يبص لشاكيرا وبيونسيه واخواتهم
ينطص فنظره ويخزء عينه مسمار كبير من الحجم
العائلى قولوا اااااااامين
ملحوظه:وقت كتابه الموضوع كان من عده سنوات أثناء زياره بيونسيه لمصر
ليست هناك تعليقات:
إرسال تعليق