عارفه حضرتك ولامؤاخذه

سواقين التاكسى من أجمل الشخصيات اللى ممكن تشوفوها فى حياتكم،ناس شايفين ولفين ودايرين بجد وبيشوفوا كل الأصناف والألوان بتاعه الكائنات البشريه(احنا يعنى) بالاضافه لكده عندهم خفه دم مش طبيعيه وفى منهم عندهم غباء مش طبيعى برده

أول ما تركب التاكسى سواق التاكسى يمسكك كلام من لحظه ما تحط رجلك فى التاكسى ويمكن كمان من قبل ماتحطها ،تلاقى السواق يبصلك كده ويقولك رايح فين يا أستاذ؟تقوله المكان يقولك تاريخ المكان ده من أوله ولحد أخره وكأنه كان مولود فى كل شوارع مصر مفيش مكان مايعرفش عنه كل حاجه ده ناقص يحكيلك عن الناس اللى فى البيوت اسمهم ايه وعندهم كام عيل وأبوهم بيقبض كام فى الشهر وحماتهم بتجيلهم أيام ايه فى الاسبوع
اللى يبسطكم بقى ان سواقين التاكسى بيجتمعوا فى نقطه مهمه جدا وهى انهم مايعرفوش أى حاجه عن أى حاجه وبيحبوا التأليف قد عنيهم عشان يحسسوا الزبون(سيادتك)انهم عباس العقاد أو نجيب محفوظ وان دبه النمله هم عارفينها وان سواقه التاكسى مبتأثرش على معلوماتهم وثقافتهم وفى شخصيات منهم بياخدوا الأحداث الجاريه من الأخبار بس يفهموا عنوان الموضوع ويضيفوا عليه أى تحابيش من عندهم وبيكون الموضوع من جواه تفسيرات تانيه خالص غير تفسيرات سيادته(السواق)
كل اللى فات ده بقى فى طريقه تعامل سواق التاكسى مع الرجاله الكبار فى السن أو الشباب ،لكن تعاملهم مع البنات والستات حاجه تانيه خالص
لكن مع البنات والستات سواقين التاكسى بينقسموا لنوعين
النوع الأول بيكون بدقن طوييييييله واصله لحد بطنهم والنوع التانى اللى لابسين قميص عليه ورود وورق شجر وحاطين سماعه بلوتوث فى ودنهم
النوع اللى بدقن طويله لحد بطنه لما البنت تشاوله يبصلها بقرف ويمكن مايقفش أصلا ،وده بيعتبر ان البنات دول كائنات حرام تتواجد على كوكبهم وان كلهم فتيات ليل أو منحلين أخلاقيا ،أو بتكون مراته مطلعه عينه فى البيت فبيكره كل البنات والستات اللى على وجه الأرض عشان فى نظره ان كلهم زيها(كلكم زى بعض مفتريين وحسبى الله ونعم الوكيل فيكم عاملين زى المنشار طالع واكل نازل واكل )ده كلام عمو السواق اللى مبيحبش البنات
أما بقى النوع التانى بتاع القميص أبو شجر اللى لما تشوفوه هتحسوا انكم فى (هاواى) ده ليه تصرف تانى مع البنات اللى بيكونوا فى نظره مش بنات بس لا دول الجنس اللطيف
تشاور البنت للتاكسى يقف ويبتسم لها وتركب المسكينه وهى متعرفش انها هيجيلها صداع نصفى وكلى ويمكن شلل من اللى هيحصلها
يقولها على فين يا أنسه أو يامدام؟تقوله المكان يقولها حاضر يا (أبله)متفهموش ايه أبله دى
المهم يبص باهتمام كده للبنت فى المرايا اللى قدام ويقولها (حضرتك مرتبطه)؟
(فكركم بتفرق معاه الاجابه؟أبدااااا اللى ناوى يقوله هيقوله أيا كانت اجابتها)
يقولها أنا أول ماشوفت حضرتك والله ركبتك على طول لأن فى سواقين كتير ممكن ميوافقوش أصل المشوار بعيد (وهى تبقى بتقول جواها :لاحنين يخويا)بس اللى بيطلع شكرا لحضرتك
مش يسكت برده لا يقولها :هو حضرتك بتشتغلى؟لو قولتيله مش شغلك
يقولك أنا أسف ويرجع يكمل كلامه عادى جدا وكأن شيئا لم يحدث(غتاته ملهاش حل)
وبعدين يقولك عارفه حضرتك؟أنتى شبه الفنانه منى زكى (مش شرط منى المهم انك لازم تكونى شبه حد)
تسكتى وماترديش ….فيكمل كلامه وكأنه كاسيت واتفتح والزرار علق فلازم تمسكيه تخبطيه فى الأرض عشان يتطفى
يقولك أصل أنا والست والدتى نحب الفنانه منى أوى
وده يبقى شكل وشك قبل ماتحسى انك عايزه تقومى تعضيه وتتحولى لمصاص دماءوتخلصى منه
سواق التاكسى:عارفه حضرتك ولا مؤاخذه؟(عند سواقين التاكسى لازم كلمه ولامؤاخذه دى مع ان ملهاش أى علاقه بالجمله)
(أنتى برده ما بتتكلميش ياعينى مكتومه وسده بقك عشان مترتكبيش جريمه)
سواق التاكسى:أنا رحت أنا والست والدتى اللى حكيتلك عنها فيلم الفنانه منى الأخير عجبنى جدا بس والدتى معجبهاش ليييييييه بقى؟
ويحكيلك كل الأسباب
وبعدين يحول على الست والدته ويقول: بعيد عن حضرتك كان عندها سرطان وديتها لدكاتره كتير قالوا انها بعد الشر يعنى انها عندها سرطان والحمد لله دلوقتى خفت
بس عارفه حضرتك ولامؤاخذه؟أمى دى معنديش أغلى منها الأم دى الحنان كله مفيش زيها لا زوجه تغنى ولا أخت هى الأم ولا فيش غيرها أحن بنى أدم على ابنها
عارفه حضرتك؟أختى مثلا متجوزه من 10 سنين ورافعه على جوزها قضيه عشان تخلعه لأنه بيحبها ومش عايز يطلقها بس أصله ولامؤاخذه كان بيضربها فقالت لا يمكن أعيش معاه
أصل أختى دى نفسها عزيزه أوى
زى جدتى بالظبط أصل العيله كلها نفسها عزيزه بالتوارث من جدتى
وأول ما التاكسى يوصل وتديله الفلوس وتشكرى ربنا انك مجالكيش شلل أو بقيتى ميته من النقطه أو الخنقه
يبصلك السواق كده بكل حب ويقولك :هو حضرتك مكنتيش بتردى ليه؟