(الموضوع ده للبنات لكن طبعا أى راجل هيعدى من هنا ويعرف انه للبنات هيبقى هيموووووت ويدخل يعرف محتواه ايه (الممنوع مرغوب)وعشان أغيظكم هقولكم ان الموضوع مفيهوش حاجه خارجه وبالتالى مسموح للرجاله بالدخول والتعليق يالا نبدأ اتفضلوا معانا أنتوا من أهل البيت يعنى منتوش أغراب وخشوا برجلكم اليمين)
فتره الخطوبه بتبقى فتره الكذب الأعظم فى تاريخ البشريه ،كل طرف بيحاول يظهر بشخصيه مختلفه كتير عن شخصيته يعنى بيبان الولد والبنت وكأنهم ملايكه حدفتهم السماء وكمان كل طرف بيرسم نفسه على التانى ويعمل نفسه انه ابن البطه السودا وانه مابيشتريش الا الغالى وكأنه متربى على العز من يوم ما اتولد والكلام ده بيشمل الطبقات الغنيه والطبقات المتوسطه والطبقات النص كادحه(اللى هم أقل بكتير من المتوسط بس مش فقراء أوى)
يعنى الغنى بيعمل نفسه مابيشتريش الا الماركات اللى سعرها مبلغ وقدره وطبعا الماركات دى بتكون من أول شبشب زنوبه بتاع الحمام لححححححححد سلسه المفاتيح اللى بتكون ماركه مشهوره برده
وكذلك بيعمل الناس اللى من الطبقه المتوسطه بس دول ما بيتفشخروش أوى زى اخوانا بتوع شبشب زنوبه وما بيقولوش ان شبشب الحمام ماركه ولا حتى ملايه السريرلكن فشخرتهم بتقتصر على لبس الخروج والجزم والشنط وأى حاجه بتتعلق بلبس الخروج
أما الطبقه النص كادحه فالبنت وهى خارجه مع خطيبها تلاقيها لابسه كل الخواتم الذهب اللى جتلها من وهى صغيره لحد ماكبرت (دليل الثراء)وخطيبها تلاقيه لابس بدله سالفها من عند المكوجى اللى جنب بيتهم عشان يبين لخطيبته فى الخروجه اللى هم خارجينها واللى لبسها (المفترض انه كاجوال)انه شاب روش وعنده بدل وان البدل مغرقه دولابه لدرجه انه معندوش وقت يلبس لبس كاجوال
يعنى ال 3 طبقات عندهم عقده النقص الرهيبه ،مفيش حد فيهم بيقدر يعترف انه شخص طبيعى عنده الغالى وعنده الرخيص أو عنده الرخيص بس أو حتى معندوش حاجه
الكل غنى والكل ماشى يرمى الفلوس من كتر الثراء الفاحش
لازم الكذب والتمثيليات الفارغه اللى هتتكشف كلها بعد الجواز (لامحاله)
ليه بنكدب أو نتمنظر على شخص هنرتبط بيه ويكون شريكنا فى كل حاجه؟هنستفيد ايه؟هو لما فكر يرتبط بينا مفكرش فينا عشان الساعه ال Rolex ولا عشان الجزمه ال Louis vuitton ولا عشان بنلبس من Gucci
ولا هو يعرف أصلا أنتى لابسه ماركه ولا مش ماركه ،هو ارتبط بشخصيه جميله فى نظره من جوه ومن بره (وطبعا الجمال ده نسبى من شخص لأخر يعنى ملكه جمال الكون ممكن شخص يشوفها وحشه بس فى نظر لجنه التحكيم كانت جميله خارجيا وداخليا من خلال ثقافتها وأفكارها ومعلوماتها)
هو ارتبط بشخص ليه قلب ومشاعر وأحاسيس وما ارتبطش بساعه وجزمه وبلوزه
ولكن……
فى قواعد لازم تلتزمى بيها عشان لا يبان انك مابتشتريش الا الرخيص فيستخسر فيكى ولا يبان انك معندكيش الا الغالى فيقول انك هتضيعى فلوسه على تفاهات ومظاهر وفى حاجات هقولك عليها عشان متبوظيش الدنيا وتبقى دايما فى نظره نيكول كيدمان وكاترين زيتا جونز فى شياكتهم وفنفس الوقت تبقى جوليا روبرتس فى بساطتها لكن مش عيزاكى أبدا تبقى فى يوم شوقيه مرات تامر فى مسلسل تامر وشوقيه (هزعل منك أوىىىىى)
بصى بقى:
أولا:ما تتمنظريش بحاجه مش بتعمليها ولاتقولى انك بتشترى الغالى و انتى فعلا ما بتشتريهوش(وده طبعا مش عيب ولا غلط)
ثانيا:لو بتشترى حاجات غاليه وماركات (طبعا مش كل حاجتك من الابره للصاروخ هتكون ماركات)فما تحسسيهوش انك بتشتغلى فنانه بعد الظهر عشان ما يحسش انك هتخلصى فلوسه على ماركات ومظاهر
بالنسبه للحاله الأولى :ماتقوليش ليه بتشترى حاجتك بكام وتعملى نفسك شاطره لماتقوليله انك فاصلتى مع البياع ولا تعملى نفسك ناصحه أوى لما تقوليله انك اشتريتى الحاجه دى فى الأوكازيون بنص ثمنها(لأنه ساعتها لو ناوى يجبلك حاجه غاليه حتى لو مش ماركه بس غاليه وخلاص هيستخسر فيكى ويدورلك على هديه رخيصه فى فتره الخطوبه يشتريهالك (دبدوبه مثلا ومش من الغاليه لا دبدوب قد الفار الصغير ب5 جنيه كده ولا يجبلك مج شاى من أبو 2 جنيه ونص وبعد الجواز بقى هيملى عليكى شروطه بأن البلوزه ما يزيدش تمنها عن 20 جنيه ولوغلطتى وجبتى حاجه ب30 جنيه ممكن يطلقك وتبقى ياعينى عليكى اتطلقتى عشان عشره جنيه زياده (فأعقلى كده ومتبقش هبله)
بالنسبه للحاله الثانيه:فمش كل حاجه تشتريها فى فتره الخطوبه تقوليله اشتريتها ب5 الاف (بس)تخيل؟ولا تقوليله اشتريت ماركه كذا ب الف جنيه (بس)مش قادره اصدق انها رخيصه كده
يعنى ماترغيش كتير فى موضوع الماركات اللى جبتيها وأسعارها لأنك كده كده متجوزه عريس من مستواكى يعنى عارف ان لبسك ماركات زى لبسه بس ماتخليهوش يكره انه اتجوز واحده من مستواه (لأن طبعا معروف ان احتياجات البنت او الست فى اللبس اكتر بكتير من الراجل)
وبعد الجواز اشترى الماركات زى مابتعملى برده بس خفى عليه شويه مش كل شهر تقوليله محتاجه حاجات جديده وكلها ماركات (مش نجمه سينيمائيه سيادتك)وبعدين لو اشتريتى بلوزه ماركه مع بنطلون جينز تلت ماركه محدش هيعرف يعنى
الناس مش هتوقفك فى الشارع تقولك ليه لابسه بلوزه ماركه على بنطلون مش ماركه
لأنه حتى لو كان مرتبه كبير جدا فى الشهر فلاحظى انه زى ماسيادتك عايزه تلبسى وتتشيكى هو كمان محتاج يلبس ويتشيك ولسه فى مصاريف تانيه غير لبسكم ده غير انه لو خلفتم أولادكم كمان هيحتاجوا يتشيكوا فحاولى متكونيش (over)
وفى حاجه بقى مهم أوى تعرفوها ان اللبس مش بسعره ولا بماركته ،لأن فى النهايه السعر والماركه دى حاجه أنتى بس اللى عارفاها لكن الأهم الذوق والرقه والبساطه فى اختيار اللبس ،ممكن تلبسى حاجه مش غاليه أوى بس تلاقى الدنيا كلها بتقولك على رقتها وشياكتها وممكن تلبسى حاجه غاليه جدا ويبان عليها الذوق والرقى فى اختيار الألوان وممكن تلبسى حاجه غاليه جدا برده وتبقى مفيهاش ذوق ولا شياكه ويبقى هنا هيتقال عليكى فلاحه بالرغم من انك شاريه لبسك بمبلغ وقدره
أنا قلت اللى عندى وعقلك فى راسك تعرفى خلاصك تتنصحى تتنصحى ما تتنصحيش يبقى خلاص وماتزعجينيش بقى
ليست هناك تعليقات:
إرسال تعليق