نداء الى كل عريس..وسيم

يوم الفرح بيبقى يوم مبيتنسيش فى حياه كل عروسه وبعد مرور سنين طويله على الفرح بتفضل العروسه تتفشخر بصور الفرح قدام كل من هب ودب
وعشان صور الفرح مهمه عند كل عروسه تلاقى العروسه عشان تفرس الأعادى تحط صوره حجم عائلى لفرحها فى الصاله عشان الناس أول ماتدخل من باب الشقه يشوفوا الصوره حتى لو كان اللى هيشوف الصوره دى السباك وموظف الغاز وموظف الكهرباء والحاج عم عبده البواب وحرمه المصون

وبتفضل العروسه مهما زادت سنين جوازها حتى لو وصلت لأنها تكون جده تتكلم عن يوم فرحها وتفرج أحفادها على صور الفرح عشان تعرفهم انها قد ايه كانت جميله وقمر ،وتفضل الجده (العروسه سابقا)تحكى لأحفادها انها كانت أجمل واحده فى البلد كلها وان صديقاتها وجيرانها وأقاربها كانوا بيغيروا من جمالها الفتاك ومحدش خاااالص كان عنده ولا حتى نص جمالها(الفشر مش بفلوس وكده كده الزمن مش هيرجع عشان أحفادها يشوفوها قبل الفرح لما كانت بشعر أكرت او مضروب فى الخلاط ووش مقشف)

وفى يوم الفرح بيبقى الطبيعى دايما ان العروسه هى ملكه الحفل وعشان هى الملكه فى اليوم ده بالذات بتبقى عند الكوافير قبل الفرح ب 5 أو 6 ساعات عشان يخليها ملكه فعلا ويهندسها ويظبطها وبعد مليون طبقه ماكياج على وشها و 2000 رشه مثبت شعر على شعرها بعد مياخدله 200 وش مكواه وسيشوار بتبقى العروسه فعلا ملكه ولومؤقتا لحد ما يخلص الفرح بساعه ولا اتنين وتغسل وشها وشعرها وتنكشف الحقائق المريره

والعروسه مهما كانت مش جميله يوم الفرح بتكون جميله بعد الكوافير والماكياج…لكن المشكله بقى لو العريس وسيم جدا وشكله أجمل منها حتى بعد الماكياج…..هنا بقى تكمن أعظم مشكله فى العالم
هنا بقى يا ساده هتنقلب الأدوار وبدل ما العروسه هتبقى ملكه الحفل هيبقى العريس هو الملك وده بقى المستحيل بعينه فى عرف أى عروسه وخاصه فى اليوم ده بالذات

ليه بقى مستحيل فى عرف أى عروسه؟
أقولكم ليه….لأن فى فيديو للفرح هيثبت كل الوقائع دى صوت وصوره
والصوره الحجم العائلى اللى بتتمناها كل عروسه واللى هتتحط فى الصاله عشان يشوفها السباك وعم عبده البواب مش هتبقى صوره لأنها هتبقى فضيحه وشهاده موثقه من عمو بتاع استوديو التصوير وعليها ختم مش أقل من 200 شخص من اللى حضروا الفرح بوحاشه العروسه فى يوم مهم زى ده
والأهم من كل ده ان عواجيز الفرح مش هيسيبوا العروسه فى حالها وهيفضلوا يبصبصوا للعريس من تحت لتحت ويعاكسوه ولما يروحوا يتصوروا مع العروسين هيحضنوا العريس أوى ويتصوروا معاه كتير وكأن الفرح ده فرحه لوحده والجردل اللى قاعده جنبه دى ملهاش لزمه

وعواجيز الفرح مشهورين طبعا بأنهم مفيش حاجه بتعجبهم وكل حاجه لازم ينتقدوها وطبعا العروسه هتبقى فرصتهم الوحيده(هتلاقيهم قاعدين يمصمصوا على شفايفهم ويقولوا:شوفوا يختى العروسه المصديه ،لكن بصوا العريس قمر حارسه وصاينه….اختارها ازاى دى؟ده يستاهل ست ستها….بت قمر كده تليق بيه)
وهنا أوجه نداء لكل شاب وسيم قرر يتجوز بنوته مش فى وسامته ولا عندها ربعها حتى ….(انظر صوره الموناليزا فى بدايه الموضوع)

متسبقش الأحداث واستنى لما تشوفها هتخرج من عند الكوافير عامله ازاى،والله طلعت حلوه زيك أو أكتر منك يبقى خير وبركه وأنت كده فى السليم وكل حاجه هتمشى كويس زى ما مترتبلها

لكن يامعلم لو طلعت أنت أجمل منها حتى بعد الكوافير يبقى لازم تكون عامل احتياطاتك وعشان أنت تهمنى هديك شويه نصايح وأخد فيك ثواب:

1-اقطع الجزمه والشراب وتعمد تحط رجل على رجل فى الفرح بمنتهى الالاطه، عشان تبان قد ايه (بيئه)ومش من مستواها وانها كتر خيرها انها وافقت على واحد بيئه زيك

2-افضل كل شويه العب فى مناخيرك عشان تبان برده (بيئه)ومش نضيف ومش من مستواها وكأنك لسه موصلكش اختراع المناديل

3-نعكش شعرك واطلب من صديقك المفضل يجيبلك طين من أى حته عشان تحطه على وشك وتبان انك مبتحبش النضافه ولا بتحب تسرح شعرك وانك بتعتبر المشط كماليات ملهاش لزمه

4-اعمل نفسك عبيط ومعتوه وقوم احدف الأكل فى وش المعازيم واشتمهم وقولهم أنا ابن تييييييييييييييييييت عشان عزمت ناس تييييييييييت زيكم (الرقابه بتحذف) وطبعا انك تبقى معتوه وتطلع عروستك ملكه بريئه متجوزه أهبل وانسان الغاب طويل الناب أفضل مليون مره من انك تبقى عاقل ووسيم والعروسه تكون الغراب اللى قاعده معاك فى الكوشه وساعتها مضمنلكش ممكن يبقى مصيرك التقطيع فى أكياس نايلون والرمى فى البلاعه فى نفس ليله الفرح

*واتمخترى ياوحشه يازينه…..يافجله من جوه جنيييييينه طم ترالم لم تن تن تن *
وربنا يوفقكم ياشباب وفرح سعيد ان شاء الله