عارفه حضرتك ولامؤاخذه

سواقين التاكسى من أجمل الشخصيات اللى ممكن تشوفوها فى حياتكم،ناس شايفين ولفين ودايرين بجد وبيشوفوا كل الأصناف والألوان بتاعه الكائنات البشريه(احنا يعنى) بالاضافه لكده عندهم خفه دم مش طبيعيه وفى منهم عندهم غباء مش طبيعى برده

أول ما تركب التاكسى سواق التاكسى يمسكك كلام من لحظه ما تحط رجلك فى التاكسى ويمكن كمان من قبل ماتحطها ،تلاقى السواق يبصلك كده ويقولك رايح فين يا أستاذ؟تقوله المكان يقولك تاريخ المكان ده من أوله ولحد أخره وكأنه كان مولود فى كل شوارع مصر مفيش مكان مايعرفش عنه كل حاجه ده ناقص يحكيلك عن الناس اللى فى البيوت اسمهم ايه وعندهم كام عيل وأبوهم بيقبض كام فى الشهر وحماتهم بتجيلهم أيام ايه فى الاسبوع
اللى يبسطكم بقى ان سواقين التاكسى بيجتمعوا فى نقطه مهمه جدا وهى انهم مايعرفوش أى حاجه عن أى حاجه وبيحبوا التأليف قد عنيهم عشان يحسسوا الزبون(سيادتك)انهم عباس العقاد أو نجيب محفوظ وان دبه النمله هم عارفينها وان سواقه التاكسى مبتأثرش على معلوماتهم وثقافتهم وفى شخصيات منهم بياخدوا الأحداث الجاريه من الأخبار بس يفهموا عنوان الموضوع ويضيفوا عليه أى تحابيش من عندهم وبيكون الموضوع من جواه تفسيرات تانيه خالص غير تفسيرات سيادته(السواق)
كل اللى فات ده بقى فى طريقه تعامل سواق التاكسى مع الرجاله الكبار فى السن أو الشباب ،لكن تعاملهم مع البنات والستات حاجه تانيه خالص
لكن مع البنات والستات سواقين التاكسى بينقسموا لنوعين
النوع الأول بيكون بدقن طوييييييله واصله لحد بطنهم والنوع التانى اللى لابسين قميص عليه ورود وورق شجر وحاطين سماعه بلوتوث فى ودنهم
النوع اللى بدقن طويله لحد بطنه لما البنت تشاوله يبصلها بقرف ويمكن مايقفش أصلا ،وده بيعتبر ان البنات دول كائنات حرام تتواجد على كوكبهم وان كلهم فتيات ليل أو منحلين أخلاقيا ،أو بتكون مراته مطلعه عينه فى البيت فبيكره كل البنات والستات اللى على وجه الأرض عشان فى نظره ان كلهم زيها(كلكم زى بعض مفتريين وحسبى الله ونعم الوكيل فيكم عاملين زى المنشار طالع واكل نازل واكل )ده كلام عمو السواق اللى مبيحبش البنات
أما بقى النوع التانى بتاع القميص أبو شجر اللى لما تشوفوه هتحسوا انكم فى (هاواى) ده ليه تصرف تانى مع البنات اللى بيكونوا فى نظره مش بنات بس لا دول الجنس اللطيف
تشاور البنت للتاكسى يقف ويبتسم لها وتركب المسكينه وهى متعرفش انها هيجيلها صداع نصفى وكلى ويمكن شلل من اللى هيحصلها
يقولها على فين يا أنسه أو يامدام؟تقوله المكان يقولها حاضر يا (أبله)متفهموش ايه أبله دى
المهم يبص باهتمام كده للبنت فى المرايا اللى قدام ويقولها (حضرتك مرتبطه)؟
(فكركم بتفرق معاه الاجابه؟أبدااااا اللى ناوى يقوله هيقوله أيا كانت اجابتها)
يقولها أنا أول ماشوفت حضرتك والله ركبتك على طول لأن فى سواقين كتير ممكن ميوافقوش أصل المشوار بعيد (وهى تبقى بتقول جواها :لاحنين يخويا)بس اللى بيطلع شكرا لحضرتك
مش يسكت برده لا يقولها :هو حضرتك بتشتغلى؟لو قولتيله مش شغلك
يقولك أنا أسف ويرجع يكمل كلامه عادى جدا وكأن شيئا لم يحدث(غتاته ملهاش حل)
وبعدين يقولك عارفه حضرتك؟أنتى شبه الفنانه منى زكى (مش شرط منى المهم انك لازم تكونى شبه حد)
تسكتى وماترديش ….فيكمل كلامه وكأنه كاسيت واتفتح والزرار علق فلازم تمسكيه تخبطيه فى الأرض عشان يتطفى
يقولك أصل أنا والست والدتى نحب الفنانه منى أوى
وده يبقى شكل وشك قبل ماتحسى انك عايزه تقومى تعضيه وتتحولى لمصاص دماءوتخلصى منه
سواق التاكسى:عارفه حضرتك ولا مؤاخذه؟(عند سواقين التاكسى لازم كلمه ولامؤاخذه دى مع ان ملهاش أى علاقه بالجمله)
(أنتى برده ما بتتكلميش ياعينى مكتومه وسده بقك عشان مترتكبيش جريمه)
سواق التاكسى:أنا رحت أنا والست والدتى اللى حكيتلك عنها فيلم الفنانه منى الأخير عجبنى جدا بس والدتى معجبهاش ليييييييه بقى؟
ويحكيلك كل الأسباب
وبعدين يحول على الست والدته ويقول: بعيد عن حضرتك كان عندها سرطان وديتها لدكاتره كتير قالوا انها بعد الشر يعنى انها عندها سرطان والحمد لله دلوقتى خفت
بس عارفه حضرتك ولامؤاخذه؟أمى دى معنديش أغلى منها الأم دى الحنان كله مفيش زيها لا زوجه تغنى ولا أخت هى الأم ولا فيش غيرها أحن بنى أدم على ابنها
عارفه حضرتك؟أختى مثلا متجوزه من 10 سنين ورافعه على جوزها قضيه عشان تخلعه لأنه بيحبها ومش عايز يطلقها بس أصله ولامؤاخذه كان بيضربها فقالت لا يمكن أعيش معاه
أصل أختى دى نفسها عزيزه أوى
زى جدتى بالظبط أصل العيله كلها نفسها عزيزه بالتوارث من جدتى
وأول ما التاكسى يوصل وتديله الفلوس وتشكرى ربنا انك مجالكيش شلل أو بقيتى ميته من النقطه أو الخنقه
يبصلك السواق كده بكل حب ويقولك :هو حضرتك مكنتيش بتردى ليه؟

صمت وسكون

مساءات وليل طويل يجافينى النوم
ويعاندنى جنودك فى قلبى…لأفكر بك
أهرب منهم بكتاب يغرينى وأفكار تلهينى
وأعود من جديد لأبحث عنك
فارسى…أتألم…ولا أجد غير الصمت والسكون صديق
أحاول استعاده قوتى ولملمه أشلائى…
وأبحث عن نفسى….
فلا أجد الا طيف يقسم أنى …منك
أنتمى اليك وأعيش بداخلك
أتنفس بأنفاسك
وأحيا على سعادتك ووجودك
يعاتبنى عقلى على حبك ويرفض مذلتى
فأنا امرأه حره
عشقت وجهها أعين الشمس
وشهد بدلالها ضوء القمر
وأقسم بعقلها جموع البشر
فلا أقبل بتقلبات رجل
ولا أنصاف الحلول ترضينى
أيها الملك المتوج…بعشقى
أنا امرأه لاتحتمل تقلبات أسطرك
فسطر من الحب…وسطر من الصداقه…وسطر من اللامشاعر
فاقبلنى ملكه تنير مملكتك
أو اقطع شرايينى بداخلك
واجعل خلاصى بيديك
وخلصنى من صمتى وسكونى
فأنا حقا…أتألم

أفتقد نفسى

اليوم أعلنها…
أعلن اعتزال الأوهام وجدران الرومانسيه الباليه
أعلن انتهاء حاله الانتظار والشوق الى القوقعه المظلمه التى تحتوينى
كنت أحيا فى شريان أخر غير شريانى
والأن أفتقد نفسى فهى تحتاج منى أن أضمد جراحها قبل أن تتهالك
لن أترك دموعى تغمرنى
ولن أترك الضعف يتملكنى
فأعتقد أنى امرأه قويه وأستطيع الاستمرار وحدى
عوده الى كل ماهو مظلم
فانتظر ياكهفى ولا تغلق أبوابك فأنا…
أتيه وأتوق الى حمايه الى قلبى قبل جسدى
أتوق الى جدار يدفىء كل خليه تجمدت بداخلى
أتوق الى عزله موحشه تعيدنى كما كنت…
أو نصف ماكنت عليه
أشتاق الى شىء يمحى ذاكرتى كى أبدأ من جديد
أشتاق الى خيال لايلمس الواقع ليجعلنى دافئه مره أخرى
عوده الى وساده صامته وأحلام مخمليه بغد أفضل
عوده الى لحظات الصمت والغربه داخل نفسى
نادمه على خيال سرق أحلامى وداعب مشاعرى
ووهم سيظل يقتلنى ببطء
ولا أعلم متى ينتهى

لماذا تضطرنا الحياه للتعامل مع الأخرين؟

أتساءل دائما وأنا فى أقسى لحظات وحدتى لماذا يتحتم علينا التعامل مع الأخرين؟

بينى وبين نفسى لاأحتاج للاجابات النظريه الطبيعيه التى تتحدث بلغه العقل والمنطق وهى أننا نتعامل مع الأخرين لأننا لسنا فى العالم وحدنا ونتعامل معهم من أجل الحصول على المال والطعام والشراب والسكن وكل شىء

واذا لم يكن تواصلنا من أجل الأشياء السابقه فتواصلنا من أجل صله القرابه أو النسب أو المظاهر الاجتماعيه المزيفه

فالأقارب اذا كانوا بعيدين واذا كنا لا نتألم لألمهم ولا يتألموا لألمنا فلماذا هم أقارب؟لأننا من نفس النسل؟أتفق معكم أننا وأقاربنا من نفس النسل ولكن اذا حدث مكروه لقريب ندعى بالكذب أننا فى حزن من أجله،تنساب على وجوهنا دموع التماسيح التى نبكيها ليس للحزن عليه ولكن لتذكرنا مأساه مرت بحياتنا

الغريب أنى لم أعد أصدق حتى أقرب الناس حين يظهروا الحزن من أجل شخص من العائله فأنا أشعر أنهم يفعلوا ذلك كى يعززوا بداخلنا شعور الخوف على الأقارب وأنهم منا ونحن منهم ولكن كل تصرفاتهم تجعلنى لا أصدق ذلك فحين نخاف على شخص نبدى لهفه ظاهره ويظهر على ملامحنا خوف يستمر حتى تنتهى محنته ولكن هذا لايحدث

وبالنسبه للنسب:دائما تكون العائلتين(عائله الزوج وعائله الزوجه)ظاهريا فى حاله حب ولكن فى الباطن كل طرف بداخله عداوه للأخر وتظهر تلك العداوه عند حدوث أبسط مشكله ويخرج كل طرف أنيابه ومخالبه للأخر ويبرز أقوى أسلحته لاقناع الطرف الاخر بأنه قوى ويستطيع السيطره على الموقف وكسب المعركه لصالحه

بينى وبين نفسى أحلم دائما بعالم لا أحتاج فيه للتعامل مع أى شخص من اجل أى شىء

أحلم بعالم أقترب فيه من الأخرين لأنى أردت ذلك وليس لأن الحياه حكم بذلك

أنظر للأخرين أحيانا باعجاب وكيف أنهم قد تعايشوا مع الأخرين بعيوبهم ومميزاتهم وكم مره وقعوا حتى وصلوا الى هذه المرحله المتقدمه من التعايش مع الغير

وأتساءل كم مره خذلتهم الحياه فى أشخاص مقربين منهم حتى استطاعوا أن يكونوا فى حاله وسط لاهى حب شديد ولاكراهيه شديده

وكيف أساسا يستطيع شخص ان يكون وسط؟أحيانا أشعر أن الحياه والناس لونين اما ابيض ناصع البياض يملك قلبا طيبا يستطيع احتواء الجميع حتى ولو كان ذلك القلب يملك عيوبا وأخطاء ولكن طيبته تطغى على اى عيب

واما أسود شديد السواد يملك شرور الدنيا كلها من خبث ودناءه وكل شىء سىء

لا أستطيع أن أتكيف مع شخص يملك لون وسط ،فالحياه عده الوان فى نظر الناس ولكن فى نظرى هى لونين والألوان الوسط بين هذين اللونين هى مساحه أعطيها للشخص الطيب كى يصلح عيوبه ويعود ناصع البياض كما كان،ومساحه أعطيها للشخص السىء كى أتأكد من أن نظرتى كانت فى محلها

انتظر..حب كاذب

لنبدأ حوارنا أولا بتعريف الحب الكاذب،ماهو الحب الكاذب؟
هو ليس حب حقيقى اتفق فيه قلبان على تبادل المشاعرأو حتى تبادل الاهتمام هومجرد مشاعر نسجها خيال أحد طرفى القصه وزاد من اشتعال هذه المشاعركلمات محايده من الطرف الأخر(لاتوحى بالحب ولاتوحى بالكراهيه ولكنها تميل الى حد كبير الى الحب أو على الأقل فى نظرك) تزيد النار اشتعالا
حتى الأن أنت فى حاله تسمح لك بأن تكون طبيعى مثل أى شخص لم يحب تبدأ حاله بداخلك تدعوك للاهتمام بالأخر وتتوغل الرومانسيه الدافئه لشرايينك حتى تملأ جسدك(وهنا بدأت حالتك تصبح كمن أخذ مخدر جرعه متوسطه لن يضرك كثيراولكنه أحدث بعض الضرر بأجهزتك الحيويه)
لا تخف لن تحتاج الى مركز لعلاج الادمان لأن الأحاسيس التى ستقابلها من الأخر الذى من المفترض انك تحبه ستكون بارده الى درجه تجعلك تسحب كل جرعه مخدرتوغلت بداخلك بهدوء كى تخرج من هذا الحب بسلام ودون خسائر.
من المهم أن نتوازن قبل أن نبدأ فى الخروج من أى مشاعر تسللت الى قلوبنا،بالطبع لن يحدث التوازن الكامل الا بعد انتهاء التجربه وخروج المخدر كاملا
ولكن ليس هناك مانع من بعض الترنح حتى نصل للبر بسلام.

لا تخفى مشاعرك وتتظاهر بالقوه ولا تقتل قلبك وتنعت نفسك بالغباء،أنت لست قوى لتواجه نفسك بالقوه فى لحظات ضعفك والغباء هو أن تتهم نفسك بالغباء وتعيش احساس القهر ،
خذ لقب أقل قسوه من الغباء كأن تخبر نفسك أنك لم تمتلك الذكاء الكافى فى هذه التجربه ولا تتهم أبدا الأخر بأنه تلاعب بمشاعرك لأنك أنت وحدك من نسج القصه ووضع تفاصيلها وتخيل أحداثها.
لا تعيش دور المظلوم الذى يعانده القدر لأنك أنت من ظلمت نفسك وادعيت قصه مغلفه بأجمل المشاعر
لا تخجل من أحاسيسك لأنها كانت رائعه فى حينها ولحظه انتهائها أنت لم تخسر شىء وقلبك طالما أنه لم يجد الحب من الطرف الأخر سيلتئم سريعا لأنه ليس هناك ماهو رائع بينكما كى تتذكره وتحزن لأجله
تمنياتى لكم بحياه بها قصه حب واحده رائعه من طرفين ،فالحياه بدون حب لاتستحق أن نحياها..

بيلعبلى شنبه ويرقصلى حواجبه

الناس بقت بتواجه ضغوط كتير أوى فى الحياه ومن كتر ضغوط الحياه الناس انقسمت لأكتر من نوع:نوع شايل طاجن سته ومكتئب ليل نهار ومكشر فى وش الدنيا كلها بسبب وبدون سبب ومش شايف أى حاجه فى الحياه تخليه حتى يبتسم

ونوع تانى بيكتئب شويه وبعدين يرجع يحاول ينسى همه بأى طريقه عشان ترجعله الابتسامه والضحكه الصافيه تانى

ونوع تالت عايش حياته تهييس وضحك ولعب وحب وهم دول الشباب الخنافس اللى بيبقوا مرميين فى الشارع وتلاقيهم طالعينلك من أى بلاعه أو حفره ومايعرفوش أى حاجه فى الحياه الا معاكسه البنات اللى بيسموهم مزز والنوع ده من الشباب يعتبروا خبراء فى المعاكسه وكل شغلتهم فى الحياه يبحلقوا ويبصبصوا لكل بنت تعدى من قدامهم ،بس فيهم ميزه جباره وهى انهم بيطوروا من نفسهم عشان يتماشوا مع كل جديد،يعنى معاكسات السنه دى تختلف شكلا ومضمونا عن معاكسات السنه اللى فاتت واللى قبلها

يعنى زمان كانت المعاكسات أخرها الخنفس يلعب شنبه لو عنده شنب أو يرقص حواجبه ويقول ياجميل ياقمر وخلاص،كانوا شباب مؤدبين يقولوا كلمه حلوه تسعد المزه اللى بتتعاكس وبعدين يسكت

لكن دلوقتى العيال بقوا بيغيروا شكل المعاكسات ويطوروها ولا كأنهم بيطوروا مناهج وزاره التربيه والتعليم،فمثلا من سنتين المعاكسات اتطورت حاجه بسيطه وزاد عليها كلمتين :صاروخ وجامده جدا

أما السنه دى المعاكسات شكلها اختلف خاااالص وبقت فيها بجاحه لاعمركم شفتوها ولا هتشوفوها،وكأن الشباب الخنافس حالفين أى بنت تعدى من قدامهم لازم تتعاكس أيا كان لونها أو نوعها أو شكلها أو جنسيتها وكل البنات سواء وكلهم بيندرجوا تحت قائمه المزز و ضميرهم ورجولتهم متسمحلهمش يشوفوا بنت معديه من قدامهم الا ولااااازم تتعاكس(قانون الخنافس بينص على كده)

تبقى البنت ماشيه وفى حالها وتلاقى فرقع لوز ناططلها من تحت الأرض يقولها على فكره: قمر والله ومش يقول كده ويمشى لا ،ده كمان يمشى جنبها ويقولها على فكره أنا بزهق من المشى كتير وعلى فكره اسمى سامح عمركوا شفتوا بجاحه كده؟

والجديد خاااالص بقى المعاكسات اللى أخدها الشباب من قناه ميلودى بتاعه المنتج تهامى ووديع والأنسه….رشا،فلما تكون البنت ماشيه مع باباها فطبعا الولد ميقدرش يعاكسها وميقدرش يقول الكلام التقليدى بتاع المعاكسات عشان ميتلسعش على قفاه يقوم يعمل ايه؟فكركم يسكت وميعاكسش؟طبعا لا،زى ما قلنا قانون الخنافس بينص على ان أى بنت تعدى لازم تتعاكس،يقوم يضربلها كلمه محدش يفهمها الا هى زى كلمه:الله عليييييك…ياوديع(ده بقى سيم بين الشاب الخنفس والمزه اللى بتتعاكس)وطبعا الأب حسن النيه ومش بيركز مع الأنسه رشا والأخ وديع فميفهمش الكلمه وطبعا الولد يمر من تحت ايد الأب سالم غانم معاكس ومظبط المزه وكله فى التمام

والغريب ان طوب الأرض بقى بيعاكس حتى الشحات والزبال بقوا بيعاكسوا،مره كان فى شحات قاعد يشحت ومادد ايده عشان الناس تحطله فيها الفلوس وقاعد يقول لله ومن قدم خير بيداه التقاه وأول ما المزه عدت راح مسقف بأديه وقايل ياجامده انتى يامزه واترسمت على وشه ابتسامه عظيمه وكأنه حقق انتصار قومى

وده غير العربيات اللى بتمشى تضرب كلاكسات لأى بنت تعدى العربيه من جنبها وكأن ده واجب وطنى لو معملوش يتعاقب من الوطن

الأغرب من كل ده ان السياح الأجانب ولاد الحلال الطيبين واللى يعتبروا جزء من خير بلدنا واللى بيساهموا فى حمله خير بلدنا نلهفه ونديه لولادنا اتعلموا يعاكسوا

فبعد ما كانوا محترمين بقوا ياعينى أول ميشوفوا بنت مصريه يعاكسوها على طول ويظهر ياجماعه ان حتى الأجانب قانون الخنافس عندهم بيطبق نفس قانون الخنافس اللى عندنا

عشنا وشوفنا الأجانب كمان يعاكسوا بكره نشوفهم وهم بيقولوا باهيبيك يا موووزه(يعنى بحبك يا مزه) أو بص البنت الساروه دى (يعنى بص البت الصاروخ دى) أو كامده كدا (يعنى جامده جدا)،ومادام قرروا يعاكسوا يبقى لازم يتعلموا أصول المعاكسه زى الغمز بعين واحده مع كلمه جامده جدا ،وابداء الانبهار وملامح من الهطل المصرى الأصيل مع كلمه صاااااروخ

اصبروا اصبروا ولسه واللى يعيش….ياما يشوف

جدو مات وتيته اتقتلت

خمسه وخميسه انهارده الخميس وكان عندنا كتكوت وكبر وبقى عنده خمس سنين ويوم 5 جدو مات ويوم 15/5 تيته اتقتلت من 5 أشخاص كانوا لابسين سلسله عليها كف فيه 5 صوابع

طبعا ليكم صحاب أو أقارب أو جيران عندهم عقده انهم محسودين طول الوقت وانهم منظورين دايما والعين عليهم وان الناس مش سايباهم فى حالهم ودايما باصينلهم فى كل حاجه وبالتالى الاشخاص دول بيكون كل كلامهم فيه رقم 5 ولو مكنش فيه رقم 5 بيكون فيه أى مواضيع مأساويه عشان الناس المتخلفين عقليا اللى بيكلموهم (اللى هو احنا) يعتقدوا ان حياتهم مش سعيده زى ماهو ظاهر قدامنا وعشان نتأكد ان حالنا أفضل منهم بكتييييييييير(ومنبصلهمش)

ويمكن بيخافوا يتسخطوا قرد لما نحسدهم تلاقوا أى مكالمه مع الناس دول كلها مشاكل ومأساويات ومصايب ملهاش أول من أخر

هيقولولكم ان جدهم مات وتيتهم اتقتلت بعد جدهم بأسبوع وهيقولوكم ان الشغل بتاعهم مش مريحهم

بعد قرايه الفتحه هيقولوا ان الفلوس يادوب وانهم هيجيبوا شبكه صغيره وبسيطه عباره عن الدبله والمحبس بتاعها وبس وتلاقوا فى الخطوبه شبكه تمنها يجى 70 الف جنيه وكولييه دهب تقيل جدا جدا جدا مع اسوره مجعلصه قد الكبه(قد الكبه بمعنى انها كبيره بشكل مفيهوش أى رقه أو شياكه)

لما يتخطبوا بعد الخطوبه هيقولولكم ان العيلتين بتوع العريس والعروسه اتخانقوا وان أسوره الشبكه ضاعت بقدره قادر ولحد 5 شهور بعد الخطوبه مش لاقيينها!!!!!!!!!على أساس انها فص مثلا وصعب يلاقوها

بعد فتره من الخطوبه هيقولوا ان الفلوس مش مقضيه يكملوا تجهيزات الشقه وانهم (بيتمنوا ندعيلهم) عشان يعرفوا يدبروا باقى المبلغ ويخلصوا تجهيزات الشقه

وهتروحوا بعد الجواز تلاقوا الشقه متجهزه بكماليات كمان زى التكييف والمايكرويف وغساله الاطباق الفاميلى سايز مش الصغننه الجميله دى والتليفزيون يجى 50 بوصه والنجفه من أرقى محلات النجف فيكى يامصر والانتريه من أرقى محلات الموبيليا الشهيره جدااااااا

وهيقولوا ان أم العريس حشريه وبتحشر نفسها فى كل حاجه وأم العروسه لسانها طويل ومبتحترمش حد ويوم كتب الكتاب تلاقى أم العريس طول الوقت تبوس فى العروسه وأم العروسه طول الوقت تبوس فى أم العريس وتتطبطب عليها

بعد كتب الكتاب (اللى سيادتكم حضرتوه وكان زى الفل)هيقولولكم ان بعدها بدقايق اتخانقوا خناقه لرب السما وكانوا هيتطلقوا

بعد الجوازهيقولولكم ان باباهم عنده مرض بقاله شهور ومفيش دكتور عارف يعالجه وبالتالى بيت الزوجيه ده مش بيعتبوه لانهم ديما فى المستشفيات مع الاب المريض
وانهم لما اتجوزوا ووهم فى شهر العسل جالهم تسمم ومقضوش ولايوم من شهر العسل سوا لانهم كانوا فى العنايه المركزه عشان التسمم!!!!!!!!!

بعد فتره من الجواز هيقولولكم انهم مش سعداء مع بعض وبيفكروا فى الطلاق وان اخو العريس قاطعه بسبب الجوازه دى وان أخو العروسه قرر يسيب خطيبته عشان اتخانقوا كتير ومش قادرين يكملوا واحتمال يكون انفصالهم بسبب الجوازه دى برده

طيب ينفع أحطلكم كل المصايب دى وأقولكم استسلموا ووافقوا عالامر الواقع؟وكأنى مش عارفه أحلها ؟خمسه وخميسه ويوم الخميس قرب طبعا مينفعش أسيبكم كده ،هاتوا ورقه وقلم واكتبوا معايا الحلول

كل مصيبه تتحكى ليكم اعتبروها ميزه وقولوا للى بيحكيلكم انه قد ايه محظوووووووووووظ وحظه نار انه مصيبته وصلت لحد هنا وبسسسسسسسسسسسسسس وانك مصيبتك أكبر ويابختتتتتتتتتته ياحظظظظظظه النار ان مشكلته بسيطه كده
خليه يحس انه ضميره مأنبه انه حكالك أديك حسدته أكتر وهو لو مكنش حكالك كان زمانه فى أمان بعيد عن شر عنيك
جربوا وربنا يصبركم بقى
بنسبه ميه فى الميه هيقطعوا الاتصال بيكم ولو اتصلوا هيكلموكم مكالمه قصيره تأديه واجب ويقفلوا وده المطلوب

أبواب الجحيم

أصعب مافى الحياه أن تعيش بين الناس وأنت فى حقيقه الأمر وحدك ،لا تعرف متى ينتهى هذا الاحساس ولا تعرف الى متى ستظل تتألم وحدك،تبدأ رحله غريبه من نوعها ولا تعلم الى أين تنتهى بك ،تتزاحم الأفكار فى رأسك وخاصه الأفكار السيئه باحثا عن أى بارقه أمل أو طريق ينير ظلمات حياتك فلا تجد،تبحث عن شىء جديد يخرجك من حاله الضعف والظلام التى تسيطر على حياتك فلا تجد أيضا،تبدأ فى أن تطرق أبواب لم تخطر ببالك من قبل وغالبا تكون أبواب تقودك الى طريق الجحيم باحثا أن أى اثاره جديده بدافع التغيير والتشويق والخروج من جلدك ولو لفتره وجيزه

تخوض تجارب خارجه عن المألوف بهدف الشعور المؤقت بالرضا عن النفس ،تعيش كل لحظه بلحظتها وتجد فى الخروج عن التقاليد وأراء الأباء والأجداد والأسلاف سعاده غامره لأنك تكسر كل القيود الصحيحه والتى يسير عليها الجميع ممن حولك والتى بضعفك تسير عليها دون تفكير أو تقييم،لا تهمك نظرات الاخرين حتى ولو كانت سيئه بحقك وبسلوكك وسمعتك فكل هذا لا يهم طالما أنك ترضى نفسك وطالما أنك سعيد بمغامراتك

تخطىء وتخطىء وتخطىء وتدخل فى دائره أكثر ظلاما وهى تأنيب الضمير والخوف من نظرات الأخرين الذين قد لا يعرفوا شيئا عن مغامراتك ولكنك لثقتك أنك مخطىء وسىء السمعه ولو فى نظر نفسك تشعر أنهم يحتقروك (حتى ولو لم يكن ذلك صحيح)

والغريب أنه بعد كل هذه الأخطاء وبعد الحلقات الطويله من تأنيب الضمير تجد أن حياتك لم تتغير كثيرا فتحلل لنفسك أن تخطىء وتخطىء لأنك لم تجد ما يجعلك تتغير للأفضل ،عائلتك فى مكان وأنت فى مكان أخر وأعنى بذلك أنهم حولك ولكن لا يشعروا بك ويجعلوا من أفكارك تفاهات لا تستحق ورأيك لا يستحق أن يوضع كمحل للبحث والتفكير،تجد فى كل شخص يسمع لرأيك أنه شخص غريب وكيف أنه يسمعنى ويهتم هكذا ؟هل يجاملنى أم أنه يحتاج الى مصلحه أم أنه صادق؟واذا وجدت شخص يشكو اليك من مشكله فتتعجب أنه وثق برأيك وتفكيرك وأراد مشاركتك أفكاره

فى عالمنا أصبحنا نعشق من يخرج عن المألوف ولو كان غير محترم فى نظر المجتمع فننظر اليه نحن بداخلنا أنه رائع لأنه استطاع الصمود والاعتراف بخطأ علنا ولم يخاف ويجرى الى الكهف مختبئا ،نجد فى الشخص الخارج عن المألوف مخرج لنا أيضا من عقدنا وأفكارنا القديمه فندعمه بكل ما نملك من قوى أملا فى أن نصبح مثله يوما ما ،فى قوته ومواجهته المستمره

اسأل نفسك متى ساعدك الناس وأنت فى حاجه حقيقيه اليهم ؟كيف تموت وتعيش تهتم لرأيهم فيك وتهتم بسمعتك فى نظرهم ؟وأنت ان فعلت كل مايرضيهم وكنت انسان (ظاهريا أكثر من رائع )فهل سيرضوا؟

يحبك الناس لشعور معين وجدوه ناحيتك بداخلهم ،وان فعلت كل شىء طيب وحاولت ارضاء من لا يحبك فلن يحبك أيضا وسيظل يتكلم عنك بشكل سىء لأنه فى النهايه لا يحبك

وفى النهايه أبواب الجحيم لا تستحق أن تعيش وتموت وأنت تؤنب نفسك لمرورك بها ،فمرورك بها قد يزيدك خبره فى الحياه والناس ،واذا عاتبك الناس لسمعتك اجعل التبجح أداه لايقاف السنتهم فأنت لست وحدك فى هذه الحياه الذى أخطأ وهناك غيرك الكثيرين ،وليس بالضروره أن كل انسان رائع فى نظر الناس يكون محترم ومتميز ومثال للخلق القويم

بقينا بنحب بعض…بسببك يامصر(ذكرى أيام ثوره 25/1/2011)

يااااه لما نلاقى نفسنا مجبرين نعيش فى عالم غير عالمنا الهادى

عالم فيه مشاكل وصراعات ملناش ذنب فيها

نعيش لحظات رعب وخوف من لحظتنا ومن بكره اللى منعرفش هيحصل فيه ايه

نوصل لمرحله ان أصحاب المشاعر ميكونش عندهم وقت للمشاعر

نحضر سكاكيننا وعصياننا عشان نحارب اللى يتعرض لبيتنا أو لجارتنا

نخاف على بعض كأننا أول مره نعرف بعض

تلاقى صاحبك البعيد جنبك قريب

وقريبك الغريب…أقرب لبالك

وتلاقيه بيتصل بيك كل يوم يطمن على حالك

كنا منعرفش بعض واتعرفنا فى المحنه

وبقينا أكتر من أصحاب خايفين على بلدنا كأنها ولد من ولادنا

ندمنا على كلمتين قلناهم فى لحظه غضب على بلدنا

ومعرفناش قيمتها الا لما كانت هتضيع من ايدنا

مات ناس كتير فى الأزمه وعاش ناس أكترعرفوا ان اللى طلبوه اتعمل

وان الشغب والمظاهرات عالفاضى والمليان حاجات ملهاش لزمه ولافيه منها أمل

اتحولنا لزعماء وطنيين ننصح ونرشد ونعدل أفكار غيرنا تجاه بلدنا

مع اننا كنا ولاد امبارح وأخر حاجه نعرفها يعنى ايه كلمه وطن

نضفنا الشوارع وغسلنا الدم وبقى كل همنا يرجع وطننا الأم

يحمينا ويضمنا وننام مش خايفين أحسن حرامى يهجم على بيتنا

بالرغم من اننا واثقين اننا محميين بجيران وصحاب ورب مش هيسيبنا

كنا قبل الأزمه شباب ملوش لزمه بنخاف على نفسنا

ولما لقينا بلدنا بتتاخد مننا حلفنا برب السما ماحد يدخل أرضنا ولاينتهك عرضنا

بقينا بنحب بعض ونخاف على بعض ونموت عشان وطن ….اسمه مصر

((فيها حاجه حلوه حاجه حلوه بينّا حاجه كل مادا تزيد زياده فيها انّ فيها نيه صافيه فيها حاجه دافيه حاجه بتخليك تتبت فيها ِسنه ِسنه ...*ريهام عبد الحكيم*))

نداء الى كل عريس..وسيم

يوم الفرح بيبقى يوم مبيتنسيش فى حياه كل عروسه وبعد مرور سنين طويله على الفرح بتفضل العروسه تتفشخر بصور الفرح قدام كل من هب ودب
وعشان صور الفرح مهمه عند كل عروسه تلاقى العروسه عشان تفرس الأعادى تحط صوره حجم عائلى لفرحها فى الصاله عشان الناس أول ماتدخل من باب الشقه يشوفوا الصوره حتى لو كان اللى هيشوف الصوره دى السباك وموظف الغاز وموظف الكهرباء والحاج عم عبده البواب وحرمه المصون

وبتفضل العروسه مهما زادت سنين جوازها حتى لو وصلت لأنها تكون جده تتكلم عن يوم فرحها وتفرج أحفادها على صور الفرح عشان تعرفهم انها قد ايه كانت جميله وقمر ،وتفضل الجده (العروسه سابقا)تحكى لأحفادها انها كانت أجمل واحده فى البلد كلها وان صديقاتها وجيرانها وأقاربها كانوا بيغيروا من جمالها الفتاك ومحدش خاااالص كان عنده ولا حتى نص جمالها(الفشر مش بفلوس وكده كده الزمن مش هيرجع عشان أحفادها يشوفوها قبل الفرح لما كانت بشعر أكرت او مضروب فى الخلاط ووش مقشف)

وفى يوم الفرح بيبقى الطبيعى دايما ان العروسه هى ملكه الحفل وعشان هى الملكه فى اليوم ده بالذات بتبقى عند الكوافير قبل الفرح ب 5 أو 6 ساعات عشان يخليها ملكه فعلا ويهندسها ويظبطها وبعد مليون طبقه ماكياج على وشها و 2000 رشه مثبت شعر على شعرها بعد مياخدله 200 وش مكواه وسيشوار بتبقى العروسه فعلا ملكه ولومؤقتا لحد ما يخلص الفرح بساعه ولا اتنين وتغسل وشها وشعرها وتنكشف الحقائق المريره

والعروسه مهما كانت مش جميله يوم الفرح بتكون جميله بعد الكوافير والماكياج…لكن المشكله بقى لو العريس وسيم جدا وشكله أجمل منها حتى بعد الماكياج…..هنا بقى تكمن أعظم مشكله فى العالم
هنا بقى يا ساده هتنقلب الأدوار وبدل ما العروسه هتبقى ملكه الحفل هيبقى العريس هو الملك وده بقى المستحيل بعينه فى عرف أى عروسه وخاصه فى اليوم ده بالذات

ليه بقى مستحيل فى عرف أى عروسه؟
أقولكم ليه….لأن فى فيديو للفرح هيثبت كل الوقائع دى صوت وصوره
والصوره الحجم العائلى اللى بتتمناها كل عروسه واللى هتتحط فى الصاله عشان يشوفها السباك وعم عبده البواب مش هتبقى صوره لأنها هتبقى فضيحه وشهاده موثقه من عمو بتاع استوديو التصوير وعليها ختم مش أقل من 200 شخص من اللى حضروا الفرح بوحاشه العروسه فى يوم مهم زى ده
والأهم من كل ده ان عواجيز الفرح مش هيسيبوا العروسه فى حالها وهيفضلوا يبصبصوا للعريس من تحت لتحت ويعاكسوه ولما يروحوا يتصوروا مع العروسين هيحضنوا العريس أوى ويتصوروا معاه كتير وكأن الفرح ده فرحه لوحده والجردل اللى قاعده جنبه دى ملهاش لزمه

وعواجيز الفرح مشهورين طبعا بأنهم مفيش حاجه بتعجبهم وكل حاجه لازم ينتقدوها وطبعا العروسه هتبقى فرصتهم الوحيده(هتلاقيهم قاعدين يمصمصوا على شفايفهم ويقولوا:شوفوا يختى العروسه المصديه ،لكن بصوا العريس قمر حارسه وصاينه….اختارها ازاى دى؟ده يستاهل ست ستها….بت قمر كده تليق بيه)
وهنا أوجه نداء لكل شاب وسيم قرر يتجوز بنوته مش فى وسامته ولا عندها ربعها حتى ….(انظر صوره الموناليزا فى بدايه الموضوع)

متسبقش الأحداث واستنى لما تشوفها هتخرج من عند الكوافير عامله ازاى،والله طلعت حلوه زيك أو أكتر منك يبقى خير وبركه وأنت كده فى السليم وكل حاجه هتمشى كويس زى ما مترتبلها

لكن يامعلم لو طلعت أنت أجمل منها حتى بعد الكوافير يبقى لازم تكون عامل احتياطاتك وعشان أنت تهمنى هديك شويه نصايح وأخد فيك ثواب:

1-اقطع الجزمه والشراب وتعمد تحط رجل على رجل فى الفرح بمنتهى الالاطه، عشان تبان قد ايه (بيئه)ومش من مستواها وانها كتر خيرها انها وافقت على واحد بيئه زيك

2-افضل كل شويه العب فى مناخيرك عشان تبان برده (بيئه)ومش نضيف ومش من مستواها وكأنك لسه موصلكش اختراع المناديل

3-نعكش شعرك واطلب من صديقك المفضل يجيبلك طين من أى حته عشان تحطه على وشك وتبان انك مبتحبش النضافه ولا بتحب تسرح شعرك وانك بتعتبر المشط كماليات ملهاش لزمه

4-اعمل نفسك عبيط ومعتوه وقوم احدف الأكل فى وش المعازيم واشتمهم وقولهم أنا ابن تييييييييييييييييييت عشان عزمت ناس تييييييييييت زيكم (الرقابه بتحذف) وطبعا انك تبقى معتوه وتطلع عروستك ملكه بريئه متجوزه أهبل وانسان الغاب طويل الناب أفضل مليون مره من انك تبقى عاقل ووسيم والعروسه تكون الغراب اللى قاعده معاك فى الكوشه وساعتها مضمنلكش ممكن يبقى مصيرك التقطيع فى أكياس نايلون والرمى فى البلاعه فى نفس ليله الفرح

*واتمخترى ياوحشه يازينه…..يافجله من جوه جنيييييينه طم ترالم لم تن تن تن *
وربنا يوفقكم ياشباب وفرح سعيد ان شاء الله

ليه ما بقيناش بنقرا؟؟؟

استغربت أوى لما لقيت أصحابى لما أخدهم معايا أى مكتبه عشان أشترى كتب يستغربوا انى مش بقول الكتاب ده غالى وبشتريه على طول،وتفضل كل صديقه تقولى طيب متشتريش الكتاب من هنا من المكتبه دى واصبرى لما معرض الكتاب يفتح وهتلاقى الكتب بأسعار أرخص

ليه بنعتبر اننا هندفع فلوس كتير فى شويه ورق ملوش لزمه وبنفضّل اننا ندفع الفلوس دى فى تذكره سينما أو فيلم على سى دى أو حتى وجبه ناكلها فى أى مطعم ؟؟مع ان سعر الكتاب ملوش علاقه بكميه ورقه قد ما ليه علاقه بجمال المعلومه اللى بناخدها منه،مبقولش ان أيا كان سعر الكتاب بشتريه لأن فعلا فيه كتب غاليه أوى لكن بقول ان مش مفروض نستخسر فى الكتب ونفضّل عليها أشياء تانيه لأن لكل شىء متعه خاصه فمفيش مجال للمقارنه ولا لتفضيل حاجه على حاجه لأن زى ما فيلم السينما ليه متعته وزى ما أكل المطعم ليه متعته كمان القراءه ليها متعتها الخاصه ومفيش حاجه منهم بتحل محل التانيه

وعلى فكره للى بيقول لنفسه دى أكيد كانت دحاحه أيام المدرسه وبتحب الدراسه والمذاكره فعشان كده هى بتحب القراءه بقولهم الموضوع ملوش علاقه خالص لأنى لما خلصت دراسه قولت لنفسى زيكم (الناس اللى بتقرا ديه غاويين يعذبوا نفسهم؟؟مش كفايه عليهم التعب والشقاء اللى عشناه أيام المذاكره؟؟كمان ليهم نفس يقروا...أنا عمرى ماهقرا كتب تانى كفايه عليا كتب وزراه التربيه والتعليم اللى قرفتنا فعيشتنا
وأدينى أنا انهارده اللى بقولكم ان القراءه فى المجالات اللى تحبوها هى أجمل شىء

وبلاقى نفسى كتير لما أزهق من كل حاجه أجرى عالكتاب أقراه وبحس انه متعه الكتب الورقيه أكبر بكتير من تحميل الكتب من النت لأن الكتاب لما نمسكه فى ايدنا بنحس اننا مستمتعين بيه ومركزين أكتر يعنى بتوصل أحيانا انى أقرا الكتاب وأنا باكل (بس مش دايما طبعا)وممكن أقراه وأنا فى السرير لحد ما أنام وفعلا بيكون الموضوع ممتع جدا وكأن الكتاب ده مخدر بيعيشنا فى عالم تانى وبتكون كل مشاعرنا وأحاسيسنا مع الكتاب وبس

ساعات بقول لنفسى ليه الناس مبقتش بتقرا؟؟؟وليه بيحسوا انهم لما يمسكوا كتاب انهم كده بيعذبوا نفسهم وبيضيعوا وقتهم،أصل محدش قال نشترى كتب مش بنحبها الكتب موجود منها فى كل المجالات مش مهم نقرا كتاب عن السياسه ولانقرا روايه ولاحتى نقرا قصه رومانسيه المهم نقرا لأن القراءه بالاضافه لأنها بتزود رصيدنا الثقافى ومعلوماتنا فهى كمان بتمنعنا عن غلطات كتير ممكن نرتكبها فحياتنا وحتى اللى ارتكب غلطات كبيره مش لازم نفضل نغلط طول العمر فالكتاب هو الحاجه الوحيده اللى ممكن تخليك متفكرش انك تغلط لسبب بسيط انك مشغول فى حاجه تانيه غير الغلط وبالقراءه تقدر تعمل ده

وياسلام بقى لما تقرا كتاب زى روايه مثلا تعيشك كل الأحاسيس اللى فى الدنيا فى كتاب واحد فتضحك من قلبك على أبطال القصه وتعجبك خفه دمهم وتبتدى تحس انك واحد منهم وشويه وتبتدى تعيش معاهم لحظاتهم وحياتهم وحتى لحظات انحرافهم ورا طريق الغلط وشويه يبتدوا يصعبوا عليك وفى الأخر تبكى من جواك على نهايتهم المأساويه

وعلى فكره الروايه لما بتكون فى كتاب تقدر تأثر عليك أكتر من تأثيرها عليك لو اتعملت فيلم أو مسلسل لأن الكتاب بيديك حريه الخيال وتخيل شكل الأبطال وكل حركاتهم وده بيخلى خيال القارىء أجمل من مشاهده نفس القصه عالشاشه بأبطال مفروضين عليك

وعلى فكره أنا جبت كتب أسماءها غريبه جدا وتكسف وهى كتب أدب ساخر زى مثلا كتاب عايزه أتجوز لغاده عبد العال وأديه اتعمل مسلسل ونجح كمان وجبت برده مره كتاب اسمه كلام أبيح جدا للكاتب يوسف معاطى وساعتها كنت ببقى مكسوفه أوى من اسم الكتاب فبخبيه تحت بقيه الكتب وأخليه أخر واحد بالرغم من ان الكتب دى بتتباع يعنى وبالتالى ان أنا مشتريتهاش غيرى هيشتريها فمفيش داعى لأى خجل وأنت بتشترى أى كتاب لأنك فى النهايه انت اللى هتقراه مش الناس

وفيه حاجه حلوه بقى أحيانا بعملها قبل ما أنزل أشترى الكتب وهى انى أشوف عالنت أكتر كتب جديده نازله والناس بتشكر فيها وأكتب اسماءها ولو ملقيتهاش فى المكتبه أعرف منهم هتيجى امتى عندهم وأنزل تانى أسأل عليها

صدقونى الموضوع ممتع لأقصى درجه،وجربوا مره واشتروا كتاب حتى صغير ولو ما اتبسطتوش خلاص بس مفيش مانع من التجربه وحقيقى التجربه تستاهل

وفيه معلومه قريتها على أحد المواقع عن القراءه:

((كشفت دراسة أمريكية أن قراءة المجلات وممارسة هوايات كالحياكة واعمال الخزف وألعاب الحاسوب يؤخر أو يمنع فقدان الذاكرة أثناء الشيخوخة.. اشارت الدراسة التي اجريت على عينة مكونة من 197 مسناً تتراوح اعمارهم بين 70 و89 عاما مصابون بضعف إدراكي أو فقدان ذاكرة معتدل بالمقارنة مع ألف و124 شخصا في نفس الفئة ليس لديهم تلك الاعراض ان المجموعة الثانية لم تصب بتلك الاعراض بسبب ممارستهم انشطتهم اليومية حيث كانوا اقل عرضة لمخاطر فقدان الذاكرة ب30 إلى 50% مقارنة بالمجموعة الأولى ))

((بعد ماخلصت الموضوع دورت على فيديو عن القراءه و لقيت الفيديو ده وكأنى لقيت كنز لأن الفيديو فعلا رائع...هسيب الفيديو يأكد كلامى عشان تعرفوا انه مش كلامى أنا لوحدى.......

عريس ماما (كامل الأوصاف)

استيقظت صباح ذات يوم لأجد صديقه والدتى تتصل بها لتخبرها أن هناك ثلاثه عرسان بأعمار مختلفه يريدوا عروسه أولهما يكبرنى بثلاثه عشر عاما وثانيهما يكبرنى بسته عشر عاما وثالثهما يكبرنى بعاما واحدا ولكنه لايعمل

لأكون صريحه معكم أنا أكره فكره الارتباط التقليدى أو بمعنى أخر كرهتها فهى بالنسبه لى تشبه انسان ينام ليحلم حلم وردى يتخيل فيه أنه يرتبط بفتاه تشبه قصص الاحلام ويعيش معها حياه ورديه أسطوريه فيستيقظ ويريد تحقيق حلمه فى الحال فتكون العروسه (والمفترض أنها أنا)هى الوسيله لتحقيق هذا الحلم (مجرد وسيله) دون النظر لشخصيتى أو ماذا أريد أو كيف أفكر أو حتى من أنا ،كل مايهم أن تكون العروسه ابنه لعائله محترمه فقط وهذا هو المطلوب

وتبدأ بعد الخطوبه أو حتى الزواج الخلافات من أول يوم تزداد شيئا فشيئا لأنه اعتقد انه تزوج لعبه صامته دورها فقط فى الحياه أن تقبل وتوافق على كل الأراء التى يدلى بها سيادته(العريس)وعليها أن تقبل بأن تعيش بشخصيه فتاه أسطوريه اختلقتها قصه وهميه لاتمت للواقع بصله حتى ترضيه دائما

هو أراد الارتباط بفتاه كل مواصفاتها تم تحديدها مسبقا فى خياله دون الاعتراف بأنها قد تكون مختلفه تماما عن هذا الخيال وبالتالى عيوبها تصبح شىء غير معترف به فى نظره وهنا تحدث الصدمه

وبالرغم من اعتراضى على المبدأ الا أنى قد أوافق على مقابله العريس وعائلته فى وجود عائلتى بالطبع ولكن فى مكان خارج المنزل (أتخذها نوع من الترفيه لمعرفه كيف يفكر الاخر وليس لرغبه حقيقيه منى للارتباط بهذا الشكل)ومن يعلم فقد يفلح الأمر ويتم الارتباط ولكن ظل فارق السن بينى وبين كل عرسان صديقه والدتى عائقا لا يجعلنى أتنازل ورفضتهم جميعا رفضا باتا لأنى اعتبر أن عشره سنوات أو أقل فرق بين الزوجين فى العمر هو فارق مناسب يعطى دائما المساحه للزوجين للتفاهم والتعامل

وأصبحت الخلافات على أشدها مع والدتى وقالت لى حرفيا:
العمر يجرى وقريبا سيكون عمرك سته وعشرون عاما والفارق ال ثلاثه عشر عاما الذى ترفضينه اليوم غدا سيكون الفارق عشرين عاما (ومضطره)ستقبليه، فأخبرتها بأنى لست مضطره لقبول أى شخص لايناسبنى وأنى لن أرتبط الا بمن يرضينى

فقالت لى:
أه نعم فهمت قصدك أنتِ تنتظرى كامل الأوصاف ولكن عليكِ أن تلاحظى أنكِ أيضا غير كامله الأوصاف فمن أكبر عيوبكِ أنكِ مرفهه ولاتبذلى جهدا للوصول الى أى شىء وحتى المطبخ لاتدخليه ولاتعرفى أى شىء عنه والأكبر من ذلك أنكِ لا تعملى وبالتالى فهذا العريس يأخذ بروازا خاويا غير مضطر لتحمله كثيرا وبالتالى عليكِ أن تقبلى لقائهم والا فلن تتزوجى وأنا ووالدكِ لن نعيش طويلا

فكانت اجابتى كما هى ولم تتغير:لن أقابلهم ولن أتزوج الا بمن يرضينى وأرضيه ويشعر انه يحتاجنى بحياته و أحتاج أنا ايضا أن اكون شريكته وهو ليس مضطرأيضا أن يأخذ هذا البرواز الخاوى ليزين به بيته وأمامه الكثير من الفتيات (غيرى) فأنا لست ديكور لتزيين منزل حتى وان كنت لن أتزوج طوال حياتى وحتى لو أطلق على لفظ عانس فأنا حقا لا أهتم والمطبخ قد أدخله يوما ان وجدت من يستحق أن أبذل لأجله جهدا وأنا سعيده و راضيه

وحقا صدقت يا ....... (صديق عزيز أعتز دائما برأيه وأفكاره)حينما قلت:اما حياه تستحق مع اناس يستحقون،واما عزله طويله الأمد
لن أنسى هذه الكلمات طوال حياتى فالحياه نعيشها مره واحده فقط وحياتنا حاليا لاشىء بها يسعدنا وليس هناك أيضا ما يجعلنا تعساء وبالتالى فأما أن نظل كما نحن وحدنا وهذا هو الطبيعى وما اعتدناه أو نرتبط بشخص يسعدنا ونسعده ونرضى بكل مميزاته وعيوبه معا ويرضانا كما نحن بتقلباتنا وعيوبنا وحتى لحظات جنوننا

وكم من فتيات تزيّن فى أبهى حله لحضور الأعراس لجذب عريس ولم يتزوجن وكم من فتيات ذهبن للعمل ليس لهدف تحقيق الذات كما تفعل الكثيرات ولكن لايجاد فرصه للقاء عريس وامتدت مده العمل من سنه الى سنتين وثلاث سنوات ولم يحصلن حتى الأن على عريس......انه النصيب والقدر ولاشىء سواهما...لا خطط حربيه محكمه لاصطياد عريس ولا جمال فتّان ولا أناقه مبالغ فيها ولا الف مقابله مع الف عريس ستحل هذا اللغز ان لم يقف النصيب وقفته ويقول كلمته الأخيره

وفى الحقيقه من عيوبى أنى كائن أحب الانطلاق والحريه بلاقيود ،لا أحب أن يعرف أى شخص حتى ولو كن صديقاتى أين أنا وكيف يصلوا الى طالما أردت أنا أن ابتعد وأكون وحدى ،أغلق هاتفى باستمرار لأضمن أنه لن يزعجنى أى شخص ويصل الى مكانى بسهوله،وبالتالى فلن أرتبط وأتزوج لتقييد حريتى لأضع على صدرى شعار أنا امرأه متزوجه بمجرد رجل فصفقوا لى أيها الجيران والأصحاب فأنا لست عانس، بعكس اذا كنت مرتبطه بشخص أعشق الارتباط به فيكون القيد معه هو حريه لها معانى لا يمكن وصف روعتها

لن تكون كل حياتى هى بحث عن الحب فى قصه أو أغنيه رقيقه أو حتى كلمات أكتبها لتكون عزاء لى فى وحدتى ،ولن تكون بوابات فشلى فى حب سابق هى النهايه فطالما أنى أتنفس فأنا مازلت حيه ومن حقى أن أحب وأن أعيش حياه أجمل،فحتى الكائنات الحيه تختار شريكها فليس لديهم مجتمع يجبرهم أو تقاليد تحكمهم بسن معين فلماذا نحن نقيد ونسحب الى حيث لانريد مسلوبين الاراده خاضعين لرغبه مجتمع ؟
اليس من حقنا نحن أيضا أن نختار.... ونحلم ....ونتمنى؟

ماما جابتلى عروسه

رجاله أخر زمن اللى كمان ماما بتجيبلهم العروسه فيروحوا زى الشاطرين يتقدمولها،أهو العريس اللى من النوعيه دى بحس انى عايزه أسقفله وأديله الزمزميه ومصاصه وكيس الساندوتشات عشان ياخدهم فى ايده وهو رايح لاسم النبى حارسها العروسه بدل علبه الشيكولاته أو التورته الهديه اللى بياخدهم فى ايده وهو رايح يزور أهل العروسه
تقولولى فين الرجاله الحقيقيين مش اللى مجرد ذكر فى شهاده الميلاد أقولكم أخدوا الناقه وشرخوا تقولى طيب شرخوا على فين أقولكم أموت وأعرف الخن اللى مستخبيين فيه زى الحشرات الصيفيه اللى بتستخبى فى الشتا بين الشقوق
أه لو أعرف مكانهم الرجاله اللى بجد دول كان زمانى جايباهم من قفاهم عشان أعملهم محاكمه عسكريه تحضرها كل بنت غلبانه بريئه لسه متجوزتش وأقولهم ليه سايبيننا كده ندور عليكم وأنتوا مستخبيين وكأن الأرض انشقت وبلعتكم وسايبين لنا الصراصير ومجايب البلاعات هى اللى قاعده تتنطط قدامنا طول الوقت لدرجه اننا بدأنا نصدق انكم انتهيتوا أو جتلكم شركه من شركات المبيدات أبادتكم كلكم وغالبا صاحب الشركه راجل من مجايب البلاعات والمدام قارفاه فعيشته فقرر ينتقم من كل بنت على وجه الأرض برش كل راجل من اللى بجد بجرعه مضاعفه من المبيدات عشان يموتهم موت محقق(الشر بره وبعيد عليهم)
ونقعد احنا النساء الأبرياء نسهر الليالى نفكر امتى هنلاقيهم ونكتشف الخن بتاعهم بدل منفكر امتى هنقابلهم لأن مستحيل نقابلهم لأنهم أكيد محبوسين فى مكان ما
بس على مييييييييييين هنطلعهم ونحاكمهم على غيابهم ونأمرهم يتجوزوا كل بنوته رقيقه سهتانه حاضره المحاكمه ولو رفضوا هنجوزهالهم بالاجبار احنا معندناش رجاله تقول لأأأأأأأ زمن اللأأأأأ ده كان زمان قبل مايقطعوا بينا بالسنين كده ومنعرفش عنهم حاجه
ودلوقتى احنا عملنا اللى علينا ومبقاش قدامنا غير الصيام كتير والصلاه كتير وندعى ربنا بقى يخرج كل الرجاله الحقيقيين من حفرهم وشقوقهم يااااااااااارب قولوا أمين
ملحوظه:الموضوع ليس المقصود به الاهانه للرجل الحقيقى أبدا وان كنت أعنى الاهانه للرجل الذى سمى رجل بشكل قدرى بحت

عشق الممنوع

ماحياتنا الا تجارب منها ماهو مسموح به ومنها ماهو ممنوع،المسموح به كثير والممنوع ما أكثره وما أجمله فيبدأ يداعبنا ويرسم لنا أحلام ورديه على خطى الممنوع

تزداد رغبتنا به ويزداد أملنا باختراق كل ممنوع ونجرى وراء متعه خفيه يمنحها لنا كل طريق خاطىء مشبوه وكأننا ننتصر على دين وتقاليد ورب يراقب أعمالنا ،نعتقد بأننا وحدنا الأذكياء وأن كل من يتبع الدين والسلوك الصحيح هو كائن يحبس نفسه داخل سجن قضبانه قويه ولايعلم متى سيخرج منها

ويكبر الممنوع يوما تلو الأخر وتكبر دائرته واتجاهاته وميوله وبدلا من ان يكون ممنوع واحد تزداد قائمه الممنوعات وتغلق كل أبواب التى تجعل أى شخص قادر على مساعدتنا فالمسافه بيننا وبين كل طريق مستقيم هى ملايين الأميال وحولها حدود وأسوار وأبواب كاتمه لكل الأصوات عدا صوت أنفسنا الذى يزين لنا كل طريق خاطىء

ويبدأ الملل من الممنوع بتسرب الى أنفسنا لتبدأ حقيقتنا تظهر أمامنا ومرآة الحقيقة بداخلنا حينما تستيقظ تكون مواجهتها شديده القسوه فهى قاتله فى صراحتها عاتبه علينا بقوه قاسيه فى جلد ذاتنا

والعوده الى الوراء مع مسح سجل الممنوعات الذى كانت تمتلىء به حياتنا هو درب من دروب المستحيل ولكن شىء واحد يمحى خطايا كبيره مررنا بها وهو الرجوع الى الله لأنه الوحيد القادر على جعل ضمائرنا بلسم يخفف جروحنا ولا لشخص بهذه الحياه القدره على ذلك سوى الله

فلا حب حقيقى وطاهر يمحى خطايانا ولا طبيب نفسى واعتراف بذنب فعلناه يمحى ذنبنا أو يجعلنا نسامح انفسنا

وقد يعطينا الله اشخاص يأتوا ليهدونا فنبعدهم ثم يعطينا الفرصه مره أخرى حينما يتركنا لنخطىء ونعرف أن طريق الخطأ ليس بالمتعه الدائمه التى تخيلناها وحلمنا بها

وحينما يعطينا الله فرصه أولى وفرصه أخرى ثانيه فسنندم كثيرا لو أضعنا هذه الفرص لنبحث عن الخطأ فى انتظار اشاره ثالثه اما أن تحدث واما أن تكون نهايتنا الحتميه وتذكر أن الله يمهل ولكنه لايهمل